Кендірлік - Шығыс Қазақстан облысының Зайсан ауданындағы өзен. Жоғары Ертіс алқабында. Ұзындығы 95 км. Су жиналатын алқабы -5330 шаршы километр. Тарбағатайдағы Сауыр тауының солтүстік беткейінен басталып, Зайсан көліне құяды. Арнасы жоғарғы ағысында кең шатқалды, ал Кендірлік ауылынан төмен кеңейіп, жайылмасы ұлғаяды. Өзен суы егін суаруға пайдаланылады. Кендірлік –Шығыс Қазақстан облысының Зайсан ауданындағы –ауыл. Аудан орталығы Зайсан қаласының шығысында 32 км. Сауыр жотасының етегінде орналасқан. 1870 жылы қазақтардың поселкасы ретінде іргесі қаланады. Әуелі Волчанка, 1910 жылдан Кендірлік аталды. Халқы -1,7 мың. (Қазақ Совет энциклопедиясы.- 5 том.-365 б.).

Патша өкіметінің өткен ғасырдың екінші жартысында қазақ елін басқару, жерін мемлекеттік мүлік министрлігінің қарауына беру, яғни, қазақты жер сусыз қалдырып, ризық қайнарын мемлекеттік меншігіне алу жөніндегі реформаларынан кейін бұл маңда да бір әкімшілік бөлік құрылып, ол Кендірлік болысы деп аталған. Осы болыста 1800 түтін болған. Сол жылы болыста 40 мың мал болған.

Әбзанидың жазғанына қарағанда, Кендірлік қазақтарының жері шамамен алғанда үшке бөлінеді. Сол үш бөліктің екеуі таулы да, қалған бір бөлігі орманды, далалы алқап. Таулы екі бөліктің бірі тым биікте, биік құз, қия жартасты болып келеді. Көшіп-қонуы да қиын. Мал жаюға да жарамайды. Мұның азғантай бір бөлегін бір жарым ай шамасы ғана жайлауға болады. Жаздың ми қайнатқандай ыстығында бұлжерде қоңыр салқын. Оның есесіне тамыз айының басында-ақ күн суытып, қар түсе бастайды. Шаруалар малын айдап ойға келеді.