Облыс әкімі Ермек Көшербаевтың қолдауымен, «Абай әлемі» сериясымен шыққан кітаптың бірі де бірегейі жазушы Ғаббас Қабышұлының 90 жылдығына арналған "Қаламгер" кітабы. Құрастырушы Айтмұхамбет Қасымов Қазақстанның Құрметті журналисі, Қазақстан Республикасының Жазушылар одағы мен Журналистер одағының мүшесі, Қазақстан Республикасының Мәдениет қайраткері, филология ғылымдарының кандидаты.

Ғаббас Қабышұлы - 1935 жылы 9 сәуірде Шығыс Қазақстан облысы, Ұлан ауданы, Ұранхай ауылында дүниеге келген. 1955 жылы облыстық «Алтай болышевигі» (қазіргі «Дидар») газетінде корректор, бөлім меңгерушісі, жауапты хатшы болды.
1966 жылы республикалық «Қазақ әдебиеті» газетінің редакциясына ауысып, жауапты хатшының орынбасары, көркем әдебиет, әдеби сын бөлімдерінде меңгеруші болып істеді.
1962-1968 жылдары Қазақ мемлекеттік университетінің журналистика факультетінде сырттай оқып, жоғары білім алды. 1974 жылы КСРО Әдеби қоры Қазақ бөлімшесінің директоры, 1983 жылы республикалық «Ара-Шмель» сатира журналының бас редакторы, 1989 жылы ҚЖО құзырындағы Көркем аударма және әдеби байланыс бас редакциясы алқасының бөлім меңгерушісі, 1994-1996 жылдары ҚЖО басқармасының екінші хатшысы болып, зейнеткерлікке шықты.
Еңбектері: «Көріп көңілге түйгенім»; «Күлкіңді жүрміз сағынып»; «Әлем таныған Әнуар. Признанный миром Ануар»; О.Әубәкіровтің 4 томдық таңдамалысын, Х.Есенәлиевтің 4 томдық таңдамалысын құрастырып шығарды. Әзіл-сықақ әңгімелері «Қымызхана», «Тамаша» театрларының сахналарында қойылған.
«Мінездеме», «Мысықта сақал неге жоқ?», «Күлеміз бе, қай-теміз?», «Тарихта қалғың келе ме?», «Бұл әлгі кім ғой...», «Халіңіз қалай?» «Кадр мәселесін... мәселе шешеді», «Жетім жиналыс», «Смех и слезы», «Екі хикая», «Көлденең кітап», «Сағыныш сазы», «Адамның кейбір кездері», « Жолаушылар », «Сайыңнан саяқ құрлы сая таппай...», «Төрт хат», «Тарғыл тағдыр», «Гүл аңсағай бір ғұмыр. Айғыр кемпір.», «Удай уәде», «... изация», «Арыңның сөзін айта біл. Скажи все по совести», «Анау-мынауизация» атты кітаптардың авторы. Халықаралық «Алаш» әдеби сыйлығының лауреаты (2005).
Ғаббас Қабышұлы рухани тіршілігімізде өте кең танымал, қалың жұртшылық жақсы көріп, іштартқан жазушы. Азаматтық қалпымен де, адамгершілік адалдығымен де, шынайы шығармашылық ортадағы ұстамды кішіпейілдігімен де, қадірлі ірі тұлғлардың бірі. Қалың оқырман жанына жақын болып, өзіне жақын санайтын суреткер.
Көрнекті жазушы, сатирик, аудармашы, еліміздің Шығысындағы Ұлан ауданының тумасы, абыз жасы тоқсанға толып отырған Ғаббас Қабышұлының өмірі мен шығармашылығын әңгімелейтін кітап жазбалары-қаламгердің шығармашылығы мен жазушыға аға буын әріптестерінің кезінде айтылған ықылас лебіздері, сондай ақ бүгінгі іні қарындастарының құрметінен тұратын мақалалар екі тарауға топтастырылып беріліп отыр.
Қалың оқырманға арналған кітап жазушының қаламгерлік қырларымен қоса әділ, адал, батыл, турашыл жазушының қызметін аша отырып, оқырманды бей-жай қалдырмасы анық. Көп қырлы талант иесі, Ғаббас Қабышұлы тоқсан жасқа сергек күйде, шығармашылық тіршіліктің қайнаған ортасында жетті. Осы жинақты мұқият, зейін қойып оқыған оқырман, бала кезінен бүгінгі абыз жасы-тоқсанға жеткенше шығармашылығын тастамай, әдебиеттің әр жанрына қалам тартқан танымал жазушы -Ғаббас ағамыздың өнегелі өмір жолынан ғибраты мол бір спектакль көріп шыққандай әсерде болады десем, артық айтпайтын сияқтымын. Ардың сөзін айта білген жазушының тұлғасы биік, жүзі жарқын.
Құрметті оқырман, келіңіздер кітаппен таныс болыңыздар!