Облыс әкімі Ермек Көшербаевтың қолдауымен, «Абай әлемі» сериясымен шыққан Тұрғазы Нұқайдың «Жалғыз тас» атты өлеңдер жинағымен таныс болыңыз.
Шығыс Қазақстан облысы, Ұлан ауданының Егінсу ауылдық кеңесіне қарасты Тұяқ ауылында 1937 жылы 27 -ші маусымда дүниеге келген.
1966 жылы облыстық газетке жұмысқа ауысады. Дарынның шыңдалар тұсы да дәл осы жылдардан бастау алды. Міне содан бергі кезеңде оның шығармашылық қызметі «Дидар» газеті ұжымымен тікелей байланысты өтті.

Редакцияда әдеби қызметкерден бастап, редактордың орынбасарына дейінгі жолдан өтті. Мұнда істеген жылдар ішінде Т. Нұқаевтан тәлім тәрбие алып республикамыздың сан қиырында журналист, жазушы болып жүргендер қаншама.
Тұрғазы Нұқайұлы оқырмандарға тәжірибелі журналист, ақын, жазушы ретінде таныс. «Тұңғыш», «Ұлы даланың ұлымын», «Әз ағамыз Әнекең», «Анаға тағзым», «Жарқыраған қос жұлдыз» атты кітаптардың авторы. Қазақстан Журналистер одағының мүшесі.

Ақын өлеңдерінің басты тақырыбы-лирикалық кейіпкердің бақыты мен қуанышы, қайғысы мен қасіреті, басынан кешірген тауқыметтері-жан азабы, ойлары арқылы жалпы адам баласына ортақ қортындыларға келу.
Туған жермен сырласу
О туған жер,
Неткен дарқан кең едің,
Аумағыңды
Шарлап, шалқып келемін
Шалдырмайтын
Киігіндей алдымнан
Жеткізбейді
Шексіз жота белесің
Келген сайын
Қызығыңа қана алмай
Қарай берем
Ыстық-ақсың анамдай.
Өкініш қой,
Қиналамын және мен мүсіндейтін,
Саған теңеу таба алмай.
Келем сенің,
Бұлағың боп аға алмай.
Келем әлі
Шырағың боп жана алмай.
Келемін мен:
«Кіммін», Кіммін» деген бер
Сұрағыма
Анық жауап таба алмай
«Айыртау» өлеңі
Асқақта Айыртауым асқарыңа,
Көк күмбез асқар керген аспаныңа.
Қол созып бауырыңда еркін өстім,
Өр қиял алға мені бастады да.
Болдым-ау сол кездерде сырыңды ашпақ,
Тартты да жас жанымды құзың асқақ.
Сәбилік не істетпеді, еркеледім,
Ал өмір алға озыпты ізін тастап, -деп ақын жырлағандай туған жер – мәңгілік сағыныш мекені. Туған жерін жырламаған ақын аз. Киелі топырақтың әр пұшпағы – лағыл сағыныштың қайнар көзі.
«Марқакөлдің ажары», «Рахман жаңбыры», «Қаба» деген өлеңдерінен ел деп соққан жүректі, ел үмітін ақтап шықсам деген өршіл тілек пен туған жерге деген махаббатты сезінеміз.
Жылдар өткен сайын ақын талай күрделі тақырыптарды игерді, өлеңдерінің көркемдік қасиеттерін жетілдіре түсті. Шығармалары әрдайым нақты өмір тәжірибесінен алынған шынайылығымен оқырман жүрегінен орын алған. «Ауыл», «Жол үстінде», «Тау тарланы» т.б лирикалық дастандары мен толғаулары осының айқын куәсі. Тұрғазы Нұқайұлының көптеген шығармаларында ел бірлігі, өзара ынтымақ мәселері айқын, анық айтылып, береке бірлік, ынтымақты нығайтуға шақырады.
Тұрғазы Нұқайұлы Забир Баянов атындағы облыстық журналистер жүлдесінің иегері. Алдағы уақытта да ақынның жырлары әдебиет сүйер қауымның көңілінен шығатынына сеніміміз зор. Ақынның екінші ғұмыры басталды. Келіңіздер кітаппен таныс болыңыздар!