«Абай әлемі» сериясымен шыққан Көкей Сақабаевтың «Көктас» атты кітабымен таныс болыңыздар.
Көкей Сақабаев еңбек жолын Жезқазған қаласындағы кен басқармасында бастап, кейін көптеген жылдар бойы Лениногорск (қазіргі Риддер) полиметалл комбинатында еңбек етті. Осы жылдар ішінде ол инженер конструктордың қызметін шығармашылық жұмыспен ұштастыра білді. Кітапқа атордың «Көктас» романы мен «Намыс повесі еніп отыр».

Романда табиғат байлықтарын ысырапсыз игеру жолындағы тау-кен комбинаты жұмысшыларының қажырлы еңбегі, өндіріс жанашырларының ізденісі, еліміздің индустриалды дамуына жастардың қосқан үлесі баяндалса, «Намыс» повесі Шығыс Қазақстан өлкесінің тумасы, Кеңес Одағының батыры, небәрі 21 жыл өмір сүрген Кеңес Одағының батыры Төлеген Тоқтаровқа арналған.
Сақабаев Көкей (Көпжасар) – журналист, жазушы, КСРО Журналистер одағының және Қазақстан Жазушылар одағының мүшесі. Самар ауданы, Көкжыра ауылында орта шаруа отбасында дүниеге келген. Инженер-кенші жұмысымен бірге шығармашылықты да қатар алып жүрген. Шығармаларын қазақ және орыс тілдерінде жазған. Туындылары облыстық, жергілікті, республикалық газеттер мен «Жұлдыз», «Простор» журналдарында жарияланған.
Алғашқы әңгімелер жинағы «Өткел аузында» кітабында замандастары, шахтерлер, металлургтер, техникалық зиялылар жайлы сыр шертеді. Облыстық «Коммунизм туы» газеті редакциясында жұмыс істеп жүріп, «Кенші келбеті» очерктер жинағын, Шығыс Қазақстанның кенші-металлургтері жайлы жазылған «Көктас» романын жариялайды.
1984 жылы Көкей Сақабаев өзінің бұрынғы жұмысына қайта оралып, 1990 жылға дейін Өскемен қаласында «Казгипроцветмет» мемлекеттік жобалау институтында жобаның бас инженері қызметін атқарған.
Жоғары өндірістік көрсеткіш көрсетіп, өндіріске өнертабыстық ұсыныс енгізгені үшін, белсенді шығармашылық жұмысы үшін облыстық атқару комитеті, облыстық кәсіподақ кеңесі, Лениногорск полиметалл комбинатының құрмет грамоталарымен, «Еңбек ардагері» медалімен марапатталған.
Құрметті оқырман, кітаппен таныс болыңыздар!