Семейдегі Абай атындағы қазақ музыкалы-драма театры бүкіл қазақ театры өнерінің қарашаңырағы болып саналады. Оған дәлел, 1917 жылы Мұхтар Әуезовтың басшылығымен “Ойқұдық” жайлауында қойылған “Еңлік-Кебек” пьесасы қазақ еліндегі жаңа өнердің тұсаукесері болды.
Сол Ойқұдықта маздаған шоқ бүгін егеменді елдің өркендеген өнеріне айналып, ұрпақ тәрбиесіне атсалысып келеді. 1920 жылдары құрамына әйгілі Әміре, Иса, Жұмат, Қалибек сынды майталман өнер иелерін топтастырған “Ес-Аймақ” театры, тек
1934 жылы ғана ресми түрде бекітілді.
Халыққа өнер көрсетіп, өнер тілі арқылы адамгершілік және эстетикалық тәрбие беріп келе жатқан театр, үлкен өнер -өмір, өмір - өнер жолынан өтті. Театр сексен жылға таяу уақыт ішінде 300-ден астам спектакль қойып, жалпы саны 80 миллионға тарта көрермендерді қамтып, халыққа тәрбие беруде зор роль атқарды. 1934 жылы Ілияс Жансүгіровтың “Кек” пьесасымен шымылдығын ашқан театр, ондаған алыс-жақын шетел классиктерімен қатар, әлемдік драматургия дәрежесіндегі М.Әуезовтың, Ғ.Мүсіреповтың, Б.Майлиннің, Ғ.Мұстафиннің, Р.Ғамзатовтың, Ш.Айтматовтың шығармаларын сахнаға шығарды. “Еңлік - Кебек”, “Қаракөз”, “Қозы-Көрпеш – Баян-сұлу”, “Айман - Шолпан”, “Бөлтірік бөрік астында” пьесалары театр репертуарының алтын қорына айналды. Осы жылдар ішінде театр қабырғасынан өнерге қанаттанған артистер бүкіл республика көлеміндегі барлық дерлік театрларда жемісті еңбек етті, әлі де еңбек етіп келеді.
Әдебиеттер:
Құндақбаев Б. Уақыт және театр .- Алматы: Өнер, 1981.-323 б.
Ақанұлы Т. «Боранды бекеттегі» толасты шолу: (Театр Каирде өткен халықаралық фестивальға қатысты)// Үш анық.-2002.-2 желтоқсан.
Құл-Мұхамед М. Семей театры ерледі: (Мәдениет министрі семейліктерді халықаралық фестивальдан табыспен оралуымен құттықтап хат жолдады)// Семей таңы. – 2002. – 18 қазан. – Б. 2.
Мұхамедова Р. Мысыр елінен табыспен оралды//Семей таңы. – 2002. – 27 қыркүйек. –Б.10.
Тоқпатаев У. Заман үні: (Семейдің Абай атындағы мемлекеттік қазақ музыкалық драм театрының директоры С.Мыржықбаевпен сұхбат)// Дидар.-2000.-15 сәуір.
|
|
|
