Өткендердің өмірден,
Өнегелік елге-ісі.
Өшпейді шын көңілден,
Өткен күннің белгісі, -деп кітап авторы жырлағандай кітапхана қорына Қалым Құнафияновтың «Ұрпағыма ұлағат» кітабын баласы Бақытхан Құнапиянов сыйға тартты. Деректі повестің авторы Қалым Құнафиянов ұзақ жылдар шаруашылық басқарған, Кеңес қызметінде істеген ардагерлердің бірі. Ленин, Қызыл Ту ордендерінің иегері.
Кітап бірнеше бөлімнен тұрады. Қызығы аз бала кез, соғыс өрті шарпыған жастық шақ оқушысын ойға қалдырып, патриоттық сезімін оятады.
Кітаптың негізгі мақсаты-аға буынның өмірден көрген қиыншылық, рахатын, қуаныш, күйзелісін мүмкіндік жеткенше жас ұрпаққа жеткізу. Өзі басқарған еңбек адамдарының адал ісін, ақ ниетін паш ету, тұтас бір ұжымның өрлеу, өсу жолын саралау.
Кітаптың тілі қарапайым. Жел сөз де, қызыл сөз де жоқ. Небір шытырман оқиғалар нақты болған жағдайды боямасыз, сабырмен айтып жеткізеді.
Кітаптағы әр әңгіменің, әр эпизодтың өзіндік сыры, мән-маңызы бар. Үңіле қараған адам оның астарынан танымдық та, тарихи да, ойланарлық та құпиялар табады.
Қымбатты оқырман, Тарбағатайдың айтулы азаматы Қалым Құнапияновтың «Ұрпағыма ұлағат» атты кітабы қолдарыңызда. Ендігі төреші-өздеріңіз.
|
|
|
