Облыстық «Дидар» газетінің әрбір санын оқырмандар және ұжым қызметкерлері тағатсыздана күтеміз. 25 қаңтар 2018 жылғы санындағы «Дидардың" серілері (достық шарждар) өте ұнады. Күнделікті сарыннан көрі біраз өзгеше мақаламен қауышып, осындай мақалалар көп болса екен деп тілейміз. Әзілін жазғандар - Мұратхан Кенжеханұлы, Есімжан Нақтыбайұлы, Дарын Нұрсапаров, суреттерді салған - Мерей Қайнаров, Нұржан Кенжеұлы екен.

Шолушы Серік Құсанбаевқа

Абылайға дат айтқан,

Бүгінгінің Бұқары.

Аруларды мас қылар,

Жырдан шашқан жұпары.

Керекуден келген соң,

Өскеменде өнердің,

Жаңа ошағы тұтады.

Домбырасы тұрады,

Солақайға ыңғайлы.

Кабинетінде күй шертсе,

Көршілер келіп тыңдайды.

Ақиқаттың алдында,

Айтарын айтпай тынбайды.

Үйге барса Дидары,

Жұмысқа келсе «Дидары».

Тек дидардан бұйырған,

Бұл Секеңнің сыйлары.

Соның ішінде Серік Құсанбаевқа жазылған әзіл ұнады. Оқырман әзілді оқыған соң бұл кім, қандай журналист деген сұрақ туындайды. Сонау тәуелсіздіктің алғашқы жылдарында 1993 жылы халық ақыны Әсия Беркенова екеуі Қазақстанды Туркияға таныстырған азамат. Айтыскер ақынның, А. С. Пушкин атындағы кітапхана қорындағы «Жырлаумен өткен 20 жыл» атты кітабымен таныс болыңыз. Серік Құсанбаев-сөз сайысы өнерінің, айтыстың көрнекті өкілі. Ақынның жинағының алғашқы бөліміне айтысқа келу, қалыптасу, шыңдалу, одан әрі өнердің шырқау шыңына құлаш ұру жолындағы сан қилы оқиғалар желісін қамтитын эссе-баяны беріледі. Ал келесі бөлімдерге таңдаулы айтыс үлгілері, ащы ақиқаттығы үшін эфирде «кесіліп кеткен» жекелеген өткір жыр шумақтары топтастырылған.

Жаңадан ғана айтыс өнерімен айналысып жүрген жастарға таптырмайтын құрал. Оқырмандар да өзіне керегін табар деп сенемін. Ендеше кітап сіздің еншіңізде.