Көршілес Монғолияның Баян Өлгий аймағы Ақтан Бәби атындағы орталық кітапхана директоры Асқар Шаймардан бастаған бір топ кітапханашылар кітапханааралық әріптестікті нығайтып, тәжірибе алмасу үшін біздің кітапханада қонақта болды. Тәжірибе алмасу «Болашаққа көзқарас » жобасы аясында өтті.

Қонақтар  облыстың бас  кітапхананың жұмысымен танысты. Тегін компьютерлік курстар өткізілетін IT-отау, балалар секторындағы интерактивті стол, халықаралық ресурстар орталығының тіл үйрету,  Майкер спейс үйірмесі қонақтардың қызығушылығын туғызды.

Шетелдік кітапханашылар кітапханада өтіп жатқан  «Электрондық азамат» мемлекеттік қызмет жәрмеңкесіне қатысты. Түстен кейін кітапхана ресурстарын үйрену үшін дөңгелек үстел отырысы өтті. Қонақтар «Біздің Абай» электронды кітапханасы, өлкетану қызметі, құжаттарды электронды жеткізу туралы толық мағлұмат алды. Облыстық кітапхана қорына Монғолия тарихына арналған монғол тіліндегі  екі томдық жинақты, қазақ жазушыларының бірнеше шығармаларын сыйға тартты. Облыстық кітапхана өз кезегінде «Қазақтың дәстүрлі 1000 әні», «Шығыс Қазақстанның музыкалық мұрасы» т.б. кітаптарды баянөлгийлік оқырмандарға жіберді.