16 мамыр күні Күршім аудандық Мәдениет үйінде жерлесіміз, жазушы Асқар Алтаймен кездесу өтті.

Асқар Құмарұлы Алпысбаев (Алтай) 1963 жылы Зайсан қаласында туған.

Күршім ауданының Қаратоғай ауылында балалық шақтың бал дәуренін өткізген. Кеше ғана Күршімнен аттанған кекілді қара бала бүгінде елімізге танымал қаламгер, «Алаш» халықаралық сыйлығының лауреаты.

Кездесуге осы Күршімнің тумалары, облыстық кітапхана қызметкерлері Ш. Нұрғалымқызы мен З. Мұхтарханқызы арнайы қатысты. Кешке жиналған қонақтар сағынысып көріскен жерлестерін ақжарма көңілмен қарсы алды. Кезінде «жігіт сұлтаны» номинациясының жеңімпазы болған, әнші Есен Мәженовтың орындауындағы «Ауылға барам» әні жүрек қылын шертіп, туған жерге деген сағынышты қоздыра түсті. Асқардың жазуға деген құштарлығын оятып, әдебиет әлеміне жетектеген ұстазы Нүрбила Ерубаева жазушының шығармашылығына кеңінен тоқталып, шәкіртіне деген телегей теңіз тілегін білдірді. Асқар Құмарұлы өзінің сиясы кеуіп үлгермеген хикаяттар мен романдардан тұратын «Алтай балладасы» атты кітабының тұсауын кесті. Қарт ұстаз, өлкетанушы С. Қалиғожин, Семей қаласынан келген журналист С. Төлеуов, Риддерден келген кластас досы Б. Оқасов қызықты естеліктерімен бөлісті. Аудан әкімінің орынбасары М. Халелов Күршім Алтайын әлемге паш етіп жүрген жерлесіне алғысын білдіріп, шапан жапты, Көкжал Барақтың мерейтойлық төсбелгімен марапаттады. Облыстық кітапхана қызметкері З. Мұхтарханқызы жазушының балалық шағынан естеліктер айтып, кітапханада жазушы шығармашылығының насихатталуына тоқталды. Жазушыға облыстық кітапхана ұжымы мен оқырмандар атынан   «Шығыс Қазақстан облысы» энциклопедиясын сыйға тартты.

Қаратоғай ауылынан келген жазушының кластастары Асқар Құмарұлына шапан жауып, ат мінгізді. Кеш тізгінін ұстаған мәдениет және тілдерді дамыту бөлімі басшысы Бақытхан Фазылұлы мен кітапханашы Г. Айдарханқызы кешті қызықты да әсерлі жүргізе білді. Кездесуге келген көрермендер рухани жаңарып, түркі әлемінің алтын бесігі – Алтай өңіріне деген мақтаныш сезімін еселендіре түсті. Жиналғандар жазушыға мұқалмас қалам, мықты денсаулық тілей отырып,   өлкеміз туралы жаңа шығармалар күтетінін аманат етті.

                                                                                                                     З. Слямова