17 мамыр сағ. 15.00-де А. С. Пушкин атындағы кітапханада қазақтан шыққан тұңғыш әскери ұшқыш, біртуар азамат Жақыпбек Малдыбаевтың туғанына 110 жыл толуына орай еске алу кеші өтті. Кешіміздің қонақтары ұшқыштың немере-інісі Болатбек пен Нұрлыбек Малдыбаевтар келіп аталары жайлы тартымды әңгіме айтып берді және осы ұшқышымыздың өмірін зерттеп жүрген жерлес жазушы-журналистеріміз Айтмұхамбет Қасымов, Оңдасын Елубай ағаларымыз кеш қонақтарына тартымды да әсерлі әңгіме сыйлады. Кештің көркін қазақтың күмбірлеген домбыра дауысымен Ағайынды Абдуллиндер атындағы Өнер колледжінің студенті Санат Амантай «Адай» күйімен ашып, Құрманғазының күйі «Терісқақпаймен» аяқтады.

Жақыпбектей қаһарман жігіттің назарын өзіне аударған Юлия жеңгемізді де еске ала отырып, көрермендердің назарларына «Дударай» әні ұсынылып, көрнекті математик-ұстаз, бүгінгі күні зейнеткерлікте болса да білім орнында еңбек етіп жүрген – Уалханов Толыбай Нұралыұлы орындады.

Жиналған жұртшылық атынан қала әкіміне Өскемен қаласының орталығынан, ұшқыш атамызға өзіне лайық болатындай еңселі, әдемі бір ескерткіш орнатылса деген хат жолданды.

Байланысшы: Кемешева М.

Тел. 26-13-33, ішкі 123