6 сәуір 2017 жылы «Бір ел – бір кітап» республикалық акциясы аясында «Алаш туы астында күн сөнгенше сөнбейміз!» атты шара өткізілді. Құйрықты жұлдыздай ағып түсіп, артына өлмес мұра қалдырған Сұлтанмахмұт Торайғыровтың шығармашылығы Шығыс өңірімен тығыз байланысты. Алаш қозғалысының 100 жылдық мерейтойы аясында бір бірімен тығыз байланысты үш бірдей айтулы мереке аталып өтті. Ақын мұғалімдік қызмет атқарған Шыңғыстай мектебінің ашылғанына 110 жыл, 20 ғасырдың басындағы тұңғыш білім ордасы - Шыңғыстай мектебін ашқан алаш қайраткері Әбдікерім Ережепұлының туғанына -150 жыл, «Бір ел –бір кітап» акциясының басталғанына 10 жыл.

Кездесуді Бақдәулет Қуатбеков Сұлтанмахмұттың «Алаш ұраны» өлеңімен ашты. Сұлтанмахмұт – елін емірене, жұртын тебірене сүйген ұлтжанды азамат. Атар таң, батар күнде тек қана ел қамын ойлап еңіреген, ұлтына жан-тәнімен қызмет жасауды мұрат еткен Сұлтанмахмұт Торайғыровтың аласапыран уақыттағы өмірімен кітапханашы Назерке Оразғалиева таныстырып өтті.

Шығыстағы тұңғыш білім ордаларының бірі-Шыңғыстай мектебі туралы сол мектепте ұзақ жылдар қызмет істеген, биыл жасы сексеннің сеңгіріне шығып отырған, Оралхан, Дидахмет, Әлібек сияқты тұлғаларды оқытқан қарт ұстаз Сәбира Қайдарқызының сөзін көпшілік аса ынта -жігермен тыңдады. Шыңғыстайдың танымал түлектері, олардың балалық шағынан сыр шертті. Қарт ұстазға зор құрмет көрсетіліп оқырмандар, кітапхана әкімшілігі атынан Тілек Рақымбаев гүл шоғын тапсырды. Әнші Г. Қайырбекқызы абзал анаға арнап «Гауһар тас» әнін сыйға тартты. Мектеп түлектері ақын Б. Райысова, Т. Қашқынбаев жыр жолдарын оқыды.

Осы мектептің түлегі журналист Ә. Қаңтарбаев алаш қозғалысындағы Әбдікерім мен Сұлтанмахмұттың алар орны туралы әңгімеледі. Зейнеткер ұстаз К. Мергенбаева мектеп тарихынан, Әбдікерім болыс өмірінен, оның ұрпақтары жайлы сыр шертті. Шыңғыстай мектебінде ұзақ жылдар басшылық жасаған Б. Жұмақанов өз ойын ортаға салып, жас ұрпақтың алаш идеясына адал болуы, өз елін-жерін сүйетін шын патриот болып тәрбиеленуі туралы сөз қозғады.

Шыңғыстай ауылының тумасы Ербол Баянғазин өзінің жаңадан шыққан энциклопедиялық сипаттағы еңбегі «Шыңғыстай» атты кітабын кітапханаға сыйға тарты. Жинақ Шыңғыстай ауылы туралы сыр шертіп, алаш қайраткері Ә. Ережепұлы, ақын С. Торайғыровтың да өмір кезеңдерін де қамтыған.

Кездесуге жиналғандар ақын өмірімен жақын танысып, шығыс өңіріндегі тұңғыш мектеп – Шыңғыстай мектебі, оның танымал түлектері туралы, алаш арысы, 30 жыл Қаратай елін басқарған, Әлихан Бөкейхановпен бірге оқып, алаш қайраткері болған Әбдікерім болыстың өмірінен қызықты мағлұмат алады.

Оқырмандар назарына ұсынылған «Алаш туы астында күн сөнгенше сөнбейміз!» атты кітап көрмесі мен арнайы жасалған слайд кездесудің шырайын ашып, ақпаратты толықтыра түсті. Кездесу соңында жастар Шыңғыстай түлектерімен суретке түсті.

Осындай танымдық кездесулердің жастар тәрбиесіне қосар үлесі мол. Туған өлке тарихы, ондағы танымал тұлғалар туралы оқырмандардың таным көкжиегі кеңейіп, биік белестерге рухтандыратыны сөзсіз.