Пушкин кітапхансының бүгінгі қонақтары – ІІМ ШҚО арнайы күзет басқармасының қызметкерлері.
Кездесу тақырыбы – Қазақстан Республикасының құқықтық құрылымының қалыптасуы, ата заңның тарихы мен ел рәміздері.

Кез келген мемлекет өзінің алғашқы қадамын тәуелсіздігімен қатар, Конституциясын қабылдаудан бастайды. Бұл сол мемлекетті құраушы ұлттың ғасырлардан жинақталған өзіне тән ұстанымының, заңдарының, жүрген жолдарының өзегінен шығып, келешегіне бағдар жасайтын басты белгі. Ұлы даланы мекендеген алты алаштың да өз дала заңдары, өзіндік конституциясы болғаны анық. қазақ даласындағы бізге мейлінше жария болып жеткен «Қасым ханның қасқа жолы», «Есім ханның ескі жолы», Тәуке ханның «Жеті жарғысы» секілді заң жүйелері қазақ елі Конституциясының ертеректе қаланған іргетасы іспеттес.
Өлкетану секторының жетекшісі З. Слямова халық жүрегінен шығып, сынынан өткен – Ата Заң тарихын, құқық саласының академиктері С. Зиманов пен Г. Сапарғалиевтердің еңбектерін саралады. Кітапханашы Ә. Омарованың ҚР Рәміздері туралы келтірген деректері тыңдаушылардың қызығушылығын туғызды. Күзет басқармасының қызметкері Б. Мусин жастар арасындағы патриоттық тәрбиеге тоқталды. Жиналған қонақтар «Егемен елдің кемел тұлғалары» кітап көрмесін тамашалады.