«Бір ел – бір кітап» акциясы:
Ақын Дулат Бабатайұлының «Өсиетнама» кітабын ел болып оқиық!

Жылдағы дәстүр бойынша "Бір ел - бір кітап" республикалық акциясының ұйымдастыру комитеті 2016 жылғы кезекті жыл кітабы деп Дулат Бабатайұлының "Өсиетнама" кітабы таңдады. Сөйтіп, еліміздің белгілі ғалымдары мен ақын-жазушылары, облыс кітапханаларының басшылары қатысқан отырыста жабық дауыс нәтижесі бойынша зар заман ақындарының арасындағы жарық жұлдыз – Дулат Бабатайұлының шығармалары жыл бойы оқылатын болды.

Дулат Бабатайұлы – ХІХ ғасырдағы қазақ поэзиясының ірі өкілі, халқымыздың басына қара бұлт төніп, жерімізді отарлау саясаты басталғанда ұлт-азаттық қозғалысты жалпыұлттық сипатта бірінші болып қозғаған ақын. Дулат ақын 1802 жылы Семей облысы ақындық өнерді ерекше қастерлеген аймақ - Аягөз ауданында кедей отбасында дүниеге келген. Арабша сауат ашып оқыған, өз кезіндегі көзі ашық, алдыңғы қатарлы адамдардың бірі. Қараңыз : (http://imena.pushkinlibrary.kz/kz/pisateli-i-poetykz/383-.html)
Дулат Бабатайұлының тұңғыш өлеңдер жинағы 1880 жылы Қазан қаласында "Өсиетнама" деген атпен жарыққа шыққан. Ақын өз өлеңдерінде адамгершілік, жақсылық пен жамандық, қайырым мен қайырымсыздық, достық пен қастық, бірлік пен алауыздық, ақыл мен парасат, ерлік пен ездік, тәлім мен тәрбие мәселелерін көтереді.
Ақын өлеңдерінде ақиқаттың көріністері айқын бейнеленіп, қазақ даласындағы дәстүрлі хандық басқару жүйесі жойылғаннан кейін, билікке сұлтандар мен билердің келуі, сол кездегі қазақ елінің әлеуметтік өмірі суреттелген. Ақын «Тегімді менің сұрасаң», «О, Сарыарқа, Сарыарқа», «Асқар таудың сәні жоқ» және т.б. шығармаларында халықтың ауыр тұрмысы мен байлардың көрсеткен зорлық-зомбылықтарын баяндайды. «Сүлейменге», «Бараққа», «Кеңесбайға» деген өлеңдерінде патшалық шенеуліктердің әрекетін сынға алып, айыптарын әшкерелейді..
Ел тәуелсіздігінің 25 жылдық торқалы тойы қарсаңында жыл кітабы болып Д. Бабатайұлының кітабы таңдалғаны тегіннен тегін емес. Елінің тәуелсіздігін армандап, бодандыққа қарсы күрес жырларын жазған дауылпаз ақын. Дулат өлеңдері екі ғасыр өтсе де өзектілігін жойған жоқ. "Дулат- бар ақындық қуатын ел-жұртының санасын өлеңмен оятуға ат салысқан тарихи тұлға",- деген екен М. О. Әуезов.
Ендеше Дулат Бабатайұлының өлеңдерін ел болып оқиық!

З. Мұхтарханқызы
А.С. Пушкин атындағы облыстық кітапхана қызметкері