Өткен сенбіде кітапхана қызметкерлері «Алтай – түркі әлемінің алтын бесігі» атты дәстүрлі халықаралық форумның жұмысына қатысып қайтты.

Халықаралық конференцияға Англиядан, Түркиядан, Монғолиядан, Ресейден  келген қонақтар түркі әлемі туралы өздерінің ғылыми ойларымен, еңбектерімен бөлісті.

Шығыс өңірі археологиялық жәдігерлерге толы. Марғұлан атындағы Археология институтының профессоры Зейнолла Самашев Берел, Шілікті қорымдарының кереметтеріне тоқталса, академик Ғарифолла Есім түркі әлемінің мәдени-философиялық кеңістігі туралы ой қозғады. Алтай -түркі халықтарының тарихы мекені, яғни   шығыстың бас қаласын неге Алтай деп атамасқа деп ұсыныс білдірді.

Эгей университеті Түркі әлемін зерттеу институтының (Измир қаласы) профессоры Метин Екиджи Түркия- Қазақстан қарым –қатынасына тоқталды.

 Археология саласындағы көрнекті ғалым-педагог, тарих ғылымы­ның докторы, профессор, ҚР ҰҒА академигі, Қазақстандағы археология ғылымының негізін қалаушылардың бірі - Карл Молдахметұлы Байпақов XVII ғасырдың буддалық бекініс-монастырі, Аблайкит  туралы әңгімеледі. Еуропа елдері Алтайда табылған қолжазбалар арқылы бірінші рет буддалық әдебиет құндылықтарына қол жеткізгенін  мақтанышпен айтты.

Қазақ Елі тәуелсіздігінің 25 жылдық мерекесі аясында өткізіліп отырған форум – қазақстандықтардың  тұтастығын арттырып, адамзат өркениетіндегі түркі мәдениетінің орнын айқындауға жол ашатыны сөзсіз.