9 қазан күні Сарсен Аманжолов атындағы Шығыс Қазақстан мемлекеттік университетінде жерлесіміз Дидахмет Әшімханұлына арналған «Бүгінгі қазақ әдебиеті және Дидахмет Әшімханұлы» атты республикалық ғылыми-тәжірибелік конференция өтті.

Осы күні ШҚМУ-дің N9 оқу ғимаратында Дидахмет Әшімханұлына арналған баспасөз орталығы ашылды.
Конференцияға страгегиялық зерттеулер институтының директоры Ерлан Карин, А. Яссауи атындағы халықаралық қазақ-түрік университетінің «Туркология» ғылыми-зерттеу институтының директоры Құлбек Ергөбек қатысып, «Ұлттық рух жаршысы», Шәкәрім атындағы СМУ –дің доценті Айман Ақтанова «Дидахмет Әшімханұлы – қазіргі қазақ прозасының көрнекті өкілі» атты баяндамалар жасалды. Облыстық Пушкин атындағы кітапхана қызметкері Уалханова Рақия Нұралықызы қатысып, Дидахметтің шығармашылығына арналған «Тау мінезді талант» атты көрме ұйымдастырды.

Жерлес жазушы туралы «Дидахмет» атты мақалалар, естеліктер, арнаулар топтастырылған кітаптың тұсаукесері өткізілді. Бұл кітаптың шығуына А.С. Пушкин атындағы кітапхана қызметкерлері көп еңбек сіңіріп, жазушының әр жылдардағы баспасөз бетінде жарияланған мақалаларын жинастырды. Өткізілген шара Дидахмет Әшімханұлының екінші өмірінің басталғанын дәлелдеп отыр. Жазушының шығармашылығы әлі талай ұрпақ өкілдерін тәрбиелеп, оқырмандарына қызмет ете беретіні сөзсіз.