(1914-1996)

Рейзвих Андрей Егорович 1914 жылы 21 қарашада Ворошиловград (қазіргі Луганск) облысы Ровенцк ауданы Греково-Елизаветовка селосында туған.

1941 жылы Еңбек армиясына шақырылып, Свердловск облысы Туринск ауданына ағаш дайындау жұмысына жіберілген.

«Жұмыс өте ауыр болды, бірнеше адам бір мезгілде суық барақтарда тұрып, аштық пен аяздан өліп жатты. Олар еш есепсіз, бауырластар зиратына жерленді. Киер киім мен ішер асқа жарымады. Көпшілігі аштықтан қырылыпты. Әкеміз ауыр күндерді есіне алмауға тырысатын. Үнемі біздің көргенімізді ешкімнің басына бермесін!- деп отыратын» - деп еске алады балалары.

Андрей Егорович 1944 жылы денсаулық жағдайына байланысты Еңбек армиясы қатарынан босатылып, алғаш кездескен поезға отырып, Шығысқа тартып отырады. Шығыс Қазақстан облысы Белағаш селосына бас тірейді. Өмір бойы Шығыс Қазақстан (бұрынғы Семей) облысы Жаңасемей (қазіргі Бородулиха) ауданы Петропавловка селосында тұрды. Бәр өмірін «Казахстанская правда» колхозында өткізіп, еңбек етті. Басына түскен тағдыр тауқыметін мойымай көтере білген еңбек ардагері өткен өміріне өкініш білдірмей, мұңын шақпай адал еңбек етті. Еңбексүйгіш, қарапайым, өз ісіне адал, кез келгеннен көмегін аямайтын атамызды аса үлкен құрметпен, сүйіспеншілікпен еске аламыз. Ол кісі біздің арамызда болмаса да отбасы үшін орны бөлек, өнегелі, ерекше жан еді. Жарқын бейнесі мәңгі есімізде! – деп еске алады балалары мен немерелері.

Андрей Егорович Рейзвих 1996 жылы 18 наурызда өмірден өтті.

(Еңбек ардагері туралы материалды жіберген А.Е. Рейзвихтің немересі Риддер қаласының тұрғыны - Петракова А.Н.