Кезінде болыс болған Әбдікерім

Ел басқару ісінде төккен терін,

Көзі ашық, көкірегі ояу жанға

Ақ патша да көрсеткен үлкен сенім.

Жасынан Петерборда білім алған,

Алаштық көсемдермен бірге болған,

Өз елін басқаруға болыс болып,

Туған жер - Шыңғыстайға қайта оралған.

Басшылық қабілеті елден асқан,

Дамуына елдің көп үлес қосқан,

Жастарға білім беру мақсатында

Осы өлкеде ең алғаш мектеп ашқан.

Адам еді жаралған халық үшін

Сарп еткен бар қайратын, жігер-күшін,

«Қызыл өкімет» «байсың» деп, «болыссың», - деп

Батырып жіберді ғой азу тісін.

«Қызылдар» жоқ қылған соң бар еңбегін

Басына сезді қара бұлт төнгенін,

Қытай асып, амалсыз кетті тастап

Кіндік кескен, шұрайлы кұт мекенін.

Аңдыған оның басқан әр қадамын

Кеңестіктер аштырмай мүлде адым,

Шекарада соғыспен әзер өтті

Жол-жөнекей жоғалтып көп адамын.

Кеңестік өкіметтің құрығы ұзын

Қытайда да аңдыды басқан ізін,

Бас көтерер ерлерін атып-асып,

Тентіретіп жіберді ұл-қыздарын.

Тоталитар заманның қатқан тоңы

Тарихты бұрмалады жылдар бойы,

Айтқызбай Әбекеңдей адам жайлы

Ұрпаққа үлгі болар өмір жолы.

Егемендік елге кеп жеткенінде

Болыстың Қаратайдай текті елінде

Бағаланып еңбегі, есімі оның

Берілді Шыңғыстайдың мектебіне.

Автор Талғат Қашқынбаев. Өскемен қаласы 2013 жыл.