(1905-1995)

Құрманғажы Салиқов 1905 жылы «Бесжылдық» колхазының Шымдықала қыстағында дүниеге келген. Бала кезден көптеген қиындық көріп, еңбекке ерте араласқан. 1920-38 жылдары ел ішінде небір ауыр жұмыстарды атқарған.

1941 жылы ұлы Отан соғысы басталғанда басқа ер азаматтар сияқты майданға аттанады. Бірақ қан төгіс ұрыс даласына емес, еңбек армиясына бөлінеді. КСРО арнайы еңбек батаольондарын құрғаны мәлім. Тікелей әскери комиссариаттың қатысуымен, НКВД-ның бақылауымен қарапайым колхозшылар еңбек армиясына жіберіліп отырған. Құрманғажы ағамыз осы батальонның құрамында соғысқа аса қажетті қару-жарақ шығаратын зауытта, теміржолдың шпалын төсеуде жұмыс істеген. Жұмысшылардың тұрмыстық- материалдық жағдайы адам төзгісіз, тәулігіне 10-12 сағат жұмыс істейді. «Бәрі де Жеңіс үшін, бәрі де майдан үшін!» деген ұранмен еңбек көрігін қыздырған асыл ағалар күн-түн демей, уақытпен санаспай еңбек етеді. Еңбек армиясы қатарында болғандар аш, жалаңаш жүрсе де қыңқ етпеген қарусыз майдан ерлері болатын.

Құрманғажы Көпбайұлы Ұлы Отан соғысы аяқталған соң тағы бір жыл жұмыс істп, 1946 жылы туған ауылына оралады. Келе салысымен ел ішіндегі еңбекке араласып, соғыс зардабын жоюға ат салысады. 1946-1972 жылдар аралығында мал фермасының басқарушысы, ірі қара фермасында бригадир болып қызмет істейді. 1954 жылы Мәскеудегі Бүкілдүниежүзілік ауылшаруашылық көрмесіне қатысқан. 1956 жылы Мәскеуде өткен ауылшаруашылық қызметкерлерінің жиынына, 1957 жылы Көкшетауда өткен ауылшаруашылық қызметкерлерінің семинарына қатысқан. Басқа еңбек Армиясында болғандардан ерекшелігі Құрманғажы ата Ұлы Отан соғысындағы Жеңістің 20, 50 жылдық мерекелік медальімен марапатталған екен. Құрманғажы Көпбайұлы 1995 жылы 90 жасында дүниеден өткен.