Бүгiнгi ұрпақтың жүрегiне отаншылдық сезiмiн ұялатып, атадан жалғасқан батырлық дәстүрдi дәрiптеу бас тартпас парызымыз саналады. Абылаймен тiзе қоса шайқас жүргiзген Ер Жәнiбек Бердәулетұлының туғанына биыл 300 жыл толды.

Хан Абылай, бас сардар Қабанбайлардың дана басшылығында жүргізілген атажұртты азат ету соғысына бастан-аяқ қатысып, басқыншы жоңғарларды түре қуып, елін ежелгі ата баба қонысы Алтай, Тарбағатайға орналастыруға үлес қосқан Ер Жәнібектің есімі ел есінде. Батыр бабаның туғанына 300 жыл толуына орай Елбасы айтқан «Мәңгілік ел» рухы бағытында халықты жұмылдыру мақсатында Шығыс Қазақстан облысы әкімшілігі «Ел қорғаны – Ер Жәнібек» атты республикалық ашық мүшәйра жариялаған болатын.
Жыр додасына сексеннен аса үміткерлер ішінде Монғолиядан, Қытайдан танымал ақындар қатысты.

Қыркүйектің 18 күні мәдениеттің қара шаңырағы облыстық кітапхананың мәжіліс залында осы мүшәйраның қорытындысы жарияланып, жеңімпаздарды марапаттау салтанаты өткізілді. Кітапхана қызметкерлері «Ел қорғаны-Ер Жәнібек» атты кітап көрмесін ұйымдастырды. Көрмеге әр жылдары жарық көрген Ер Жәнібек туралы мақалалар, жаңадан шыққан танымдық кітаптар, сонымен қатар, дәстүрлі «Шығыс шынары» жыр мүшәйрасының жинақтары қойылды. Әділ қазылар алқасының төрағасы ақын Н.Айтов бастаған бір топ ақын –жазушылар, ҚХР келген қонақтар кітапхана қызметімен танысты. Жеңімпаздардың өлеңдері топтастырылған «Ерлік жыры-Ер Жәнібек» (Астана; Фолиант, 2014,-160 б.) жыр жинағының тұсауы кесілді. Мүшәйра жүлдегерлері –Ж. Ерман, Е. Мұхамадиқызы, Ә. Ақтай, Б. Бәмішұлы, А. Әбілқасымұлы т.б. ақындар жырдан шашу шашты.