23 қаңтар күні сағат 15.00-де А.С. Пушкин атындағы облыстық кітапханада Абай Құнанбаевтың алғашқы жыр жинағының жарық көргеніне 105 жыл толуына орай «Ғасырлық ғұмыр» атты әдеби кеш өткізілді.

Кездесу интерактивті ой қозғау түрінде басталды. «Абай» деректі драма фильмінен үзінді көрсетіліп, оқырмандарға «Абай өлеңдерінің сіздің өміріңізде алар орны қандай?» деген сұрақ қойылды. Қонақтар Абай өлеңдерінің, қара сөздерінің бүгінгі жас ұрпақ тәрбиесіндегі алар үлесі туралы өз пікірлерін білдірді. Жамбыл атындағы мектеп –гимназиясының оқушысы Телеухан Гүлден Абайдың бірінші қара сөзі мен «Заманақыр жастары» өлеңін жатқа оқып, оның тәрбиелік мәніне тоқталды.

Ғасырлық ғұмыры бар Абай өлеңдерінің 1909 жылы Петербург қаласында басылып шығу тарихына, кітаптың құрылымына кітапханашы Меруерт Емелбаева тоқталып өтті. Оқырмандарға араб графикасымен жазылған тұңғыш кітаптың электронды нұсқасы көрсетіліп мазмұны талданды. Осы жинаққа кірген өлеңдерін оқырмандар жатқа айтты. Қалиакпер Сая «Сенбе жұртқа тұрса да қанша мақтап» өлеңін, Ахмерова Еркежан «Жасымда ғылым бар деп ескермедім» өлеңін, «Нұрорда» дарынды балаларға арналған мектеп-интернаттың оқушылары ақынның жастарға арналған өлеңдерін оқыды.

Жалпы Абайдың өндіріп өлең жазған кезеңі 1881-1890 жылдарға келеді екен. Сол өлеңдерін жинақтап баспаға ұсынған оның немере інісі, әрі шәкірті, биыл туғанына 145 жыл толатын Кәкітай Ысқақұлы туралы Назгүл Қыдырова әңгімеледі.

Абай өлеңдерінің жарыққа шығуына Әлихан Бөкейханов түрткі болғанын әркім біле бермес. 1915 жылдың 18 қаңтарында Кәкітайдың өліміне байланысты «Қазақ» газетінде шыққан мақаласында «1904 жылы Абай марқұмның өлеңін кітап қылып басыңдар деп, балаларына хат жаздым», -деген жолдар соның куәсі

Өз ісінің шебері, өнерпаз, білімді, Абайдың асыл мұрасын ең алғаш кітап етіп басып шығарған баспагер Илияс Бораганскийдің өмір жолы туралы қызықты деректер оқырмандар назарына ұсынылды. Тек қазақ қана емес, жалпы түркі халықтары үшін орасан-зор еңбек етіп, ақынның тұңғыш кітабының шығу тарихын зерттеп, үлкен мұра қалдырған белгілі абайтанушы ғалым - Қайым Мұхамедханов қонақтар назарынан тыс қалған жоқ.  

Тұңғыш кітаптың шығу тарихы туралы қызықты дәлелдермен бірге тағы бір тосын сый оқырман игілігіне ұсынылды. Ғасырлық ғұмыры бар, араб графикасымен жазылған Абайдың тұңғыш кітабын көруге құмартқандар "Qazaq Aqyny Ibrahim Qunanbay Oghlynyng Olangy" ("Стихи казахского поэта Абая Ибрагима Кунанбаева"), изданный в Санкт-Петербурге в 1909 г. – жинағын облыстық кітапхананың сайтынан көре алады: http://www.pushkinlibrary.kz

Кездесуде Абайдың өлеңдері оқылып , «Желсіз түнде жарық ай» әнін барлық қонақтар қосыла шырқады. Оқырмандар атынан оқушы Телеухан Гүлден, «Нұрорда» мектебінің кітапханашысы М. Мұхамадиева кітапхана қызметкерлеріне алғыстарын білдірді. «Ұлыдан ұрпаққа аманат» көрмесі және слайд-презентация танымдық кештің мазмұнын байыта түсті.

Кездесуге жасөспірімдер, оқушылар, студенттер және поэзия мен әдебиетті сүйетін жұртшылық қатысып, рухани байып қайтты.                                                                                                    

З.Слямова