Сіздердің назарларыңызға Ұлы Жеңістің 80 жылдығы қарсаңында жарық көріп отырған «Ұлы Отан соғысы (1941-1945) жылдарында Еңбек армиясы қатарында болған шығысқазақстандықтар» жинағын ұсынамыз.
Қаншама тар жол, тайғақ кешулі нәубеттерден өткен халқымыздың тарихи кезеңдері көп. Сондай тарих еншісіндегі қacipeтті жылдардың бipi – Ұлы Отан соғысы. Біршама жыл өтсе де сол соғыстың зерттелмеген беттері бар. Соның бірі – Ұлы Отан соғысы кезінде Еңбек армиясының қатарына алынғандар тағдыры, олардың Ұлы Жеңіске қосқан үлесі. Көпшілік Еңбек армиясын тыл еңбеккерлерімен шатастырады. «Еңбек армиясы» деп Ұлы Отан соғысы жылдарында әскери жағдайға байланысты жұмысшы отрядтар қатарына мәжбүрлі еңбек міндеттерін орындау үшін жұмылдырғандарды атады. Еңбек армиясындағы адамдардың тұрмыстық-материалдық жағдайы өте ауыр болды. Олардың тұтқындардан еш айырмашылығы болмады.

«Ұлы Отан соғысы (1941-1945) жылдарында Еңбек армиясы қатарында болған шығысқазақстандықтар» жинағы А.С. Пушкин атындағы облыстық кітапхананың аймақтық өлкетану зерттеулерінің нәтижесінде қолға алынып, алғашқы басылымы қазақ және орыс тілдерінде жарыққа шығып отыр.
Ұлы Жеңіс жолында қолдарына күрек пен қайла ұстап, тікенек сыммен қоршалған жерде тұрып, жұмысқа арнайы конвоймен апарылып, адам төзгісіз жағдайда өмір сүріп, ашқұрсақ, жалаңаш жүріп-ақ аянбай еңбек етіп, бар денсаулығынан айрылған жерлестеріміздің өмірі бүгінгі ұрпаққа өнеге. Басылымға Еңбек армиясы қатарында болған адамдардың, олардың ұрпақтарының, естеліктері, мұрағат материалдары негіз болған.
Жинақты толықтыру жұмыстары әлі де жалғасуда. Туған өлке тарихына бей-жай қарамайтын жерлестерімізді бірлесе жұмыс жасауға шақырамыз! Егер Сізде Еңбек армиясына қатысқан туыстарыңыз, ауылдастарыңыз туралы қандай да бір ақпарат болса (фотосурет, өмірбаяндық мәлімет, хаттар, естеліктер), оларды spravka@pushkinlibrary.kz кітапхананың электрондық поштасына «Еңбек армиясы» деген белгімен жіберулеріңізді сұраймыз.
Біз бірлескен күшпен тарихтың көпшілікке беймәлім беттерін ашып, осынау ұлы ерлікті ұрпақ жадында сақтай аламыз.