Болат Қалибекұлы Рысбеков А.С. Пушкин атындағы кітапханада «Өмірге ғашық жанмын» атты кітабының тұсаукесерін өткізіп, кітапты сыйға тартты.

Тіршіліктің байқап жүрмін бағамын,
Бірде дұрыс, бірде бұрыс қадамым.
Бұрлаңмен ілби басып ілгері,
Елу жасқа келіп қалдым қарағым.
Орындау мен бұл өмірдің талабын,
Шұлғи басып, ілби басып барамын.
Кейде жарға, кейде орға соғылдым,
Жығылмаудың жасап келем амалын.
Той думанның асқақтатып бар әнін,
Асабалық қызметке жарадым.
Домбырамды серік етіп жаныма,
Елу жасты тұр ғой басып табаным.
Батасын ап, ақ жаулықты Ананың,
Өсиетін үлгі тұттым бабаның.
Туған жердің тұғырында түлеген,
Мен ұлымын мынау байтақ даланың,
Өлеңдетіп өнерім мен бойдағы,
Елу жасқа келіп қаппын қарағым,-дейді ақын осылайша көсіліп барып, тізгінін тежей тартып, өзіне ғана тән шалқар шабыттың шыңында шалқиды. Болат Қалибекұлы Өскеменде бірнеше шағын форматта шығармашылық кездесу кештерін ұйымдастырып, жастардың жанына тартып үнемі үлгі болып жүрген ұстаз десек артық емес. «Тарбағатай туған жер», «Шолақордам», «Байтоғасым» деген әндері ел жүрегінің төрінен орын алған туындылар. «Өмірге ғашық жанмын» өлеңдер жинағына ақынның жүректен шыққан өлеңдері енгізілді.