Айтқожин Қ. Тарбағатай-Барқытбел тарихыңды тани жүр / Қ. Б. Айтқожин. - Өскемен, АРГО ШҚПК, 2023. - 315 б.
Автор Қайрат Айтқожин "Тарбағатай-Барқытбел тарихыңды тани жүр" кітабын кітапхана қорына сыйға тартты.
Шежірелі Тарбағатай өңірінің тарихи тамыры тереңде жатыр. Тарихымызды көз жүгіртіп қарасақ, көк бөрілі түркі жұртының ту тіккен отаны еліміздің Шығысы болса, оның ұлттық рухын сақтаған өңірдің бірі Тарбағатай деп білеміз.

Мыңғырған малға өріс, аңдағайланған аңға мекен болған, тарих толқынындағы талай-талай тар жол тайғақ кешулердің өткелінен өткен Тарбағатай өңірінің қысқаша тарихын зерделеген тарихшы ұстаз Қайрат Батқанұлы Айтқожин.
Қайрат Батханұлы Қазақстан Республикасы білім және ғылым саласындағы ерен еңбегі үшін "Білім беру ісінің үздік педагогы», «Абай» мерейтойлық медалінің иегері. Қасым-Жомарт Кемелұлы Тоқаевтың "Әділетті мемлекет. Біртұтас ұлт. Берекелі қоғам" атты Қазақстан халқына арналған жолдауын білім беру саласының мамандары арасында кеңінен насихаттау мақсатында өткен "Қазақстанның мәртебелі ұстазы" атты Республикалық байқаудың жеңімпазы атанып, І дәрежелі дипломмен марапатталған.
Әрқайсымызды байтақ елім мен туған жерімнің мерейін үстем ету, үшін не істедім?,-деген сауал сәт сайын мазалайтын болса, әрбір есті азамат ұлттың тарихына, салт-дәстүріне, діні мен діліне, сусындайтын және құрметтейтін деңгейге көтерілетіні анық.
Кітап үш бөлімнен тұрады, бірінші бөлім «Бас иемін бабалар рухына, екінші бөлім «О туған жер ыстық сенің топырағың», үшінші бөлім «Кешегі тарих-бүгін есте». Сонымен қатар Ұлы Отан соғысы жылдарындағы Тарбағатай ауданы, ауданның экономикалық жағдайы, ауданның соғысқа тигізген көмегі, Ұлы Отан соғысы кезіндегі тыл еңбеккерлерінің ерен еңбегімен таныса аласыз.
Кітапқа Тарбағатай өңірінің тарихы жайлы оқиғалар, сол өңірде дүниеге келіп, ел тарихында өшпес із қалдырған тарихи тұлғалар жайында, өлкенің археологиясына, гегографиясы мен топонимикасына арналған мақалалар мен өлең жырлар топтастырылған.
Кітап ел тарихына қызығушылық танытқан оқырманға және оқу орындарындағы «Өлкетану» сабақтарына таптырмас құрал.
Құрметті оқырман, Тарбағатай ауданы туралы кітаппен таныс болыңыздар, кітап сіздің еншіңізде.