Өлең саған қарызым өтелер ме,

Сенсіз шабыт желкенін көтерер ме ?

Арманымның жаршысы, ару құсым

Айдынымнан белгісіз кете көрме, -деп жырлап жүрген Ғалым Айтқанұлы Байбатыров 64 жасқа қараған шағында дүниеден озған еді. 12 қаңтар күні тірі болса ағаның 70 жылдығын тойлап жатар едік.

Ғалым Байбатыровтың 2000 жылы шыққан «Арман дүние» атты жыр жинағы жарық көрді. Алғысөзінде «Қамшының сабындай қысқа, жалған дүние-ай!» деген жүрексыздатар сөздер бар. Ақын «осы қысқа алдамшы дүниеде адам соңғы демі біткенше арманмен өтеді» деп ой түйген екен. Иә, ол арманмен өмір сүрді. Оның арманы халқының арман-мүддесінен туындап шығармаларының арқауына айналатын. Басқаша айтқанда, ол өзі үшін емес, қазағы – халқы үшін бейнеттеніп қызмет атқарып, қаламын қару етіп мақалалар, пьесалар, өлең-жырлар жазумен өмір кешті. Сондықтан оның қырық жыл бойы жазғандары болашақта да ізгілік нұрын шашып, пьесалары сахнадан түспей, өлең-жырлары халқының жүрегін тербеп, армандары рухына айналып, халқымен бірге жасап, жалғаса бермек. Мыңдаған оқырманы тұрғанда Ғалым ағаның есімі мәңгілік.

Күнтізбенің жырттым соңғы парағын,

Тастағандай бойдағы жау-жарағын,

Бір ғасырдың аяқталды дәурені,

Құлағандай көк тіреген дарағың, - деп Ғалым Айтқанұлы өзі жазғандай өмірі қысқа болды.

18 күні сағат 15.00 де болатын «Шығыстың шырайын келтірген әз ағалар» атты әдеби сазды кешке келіңіздер. Ғалым Айтқанұлының шығармашылығына бей жай қарамайтын оқырмандарды кешке шақырамыз.

#Pushkinlibrary #Пушкинкітапханасы #мерейтой # ақын #зайсан #күнтізбе #есімдердерекқоры