22 қыркүйек 2017 жылы А. С. Пушкин атындағы Шығыс Қазақстан облыстық кітапханасына жазушы Тұрысбек Сәукетаев «Айқараңғысы», «Көлеңкелер патшалығы», «Мен-жындымын» атты кітаптарын сыйға тартты.

1950 жылы 14 қарашада Қытай Халық республикасының, Алтай аймағында туған. 1968 жылы Шығыс Қазақстан облысындағы Күршім орта мектебін бітіріп, 1970 жылы С.М.Киров атындағы Қазақ мемлекеттік университеті (қазіргі әл-Фараби атындағы Қазақ ұлттық университеті) журналистика факультетіне түсіп, осы университетт бітірген. Сәукетаев Тұрысбектің "Ұстаз" деп аталатын алғашкы өлеңі 1965 жылы Күршім ауданы "Коммунистік еңбек" газетінде жарияланған.

Қаламгер «Қилы тағдыр» атты романдар циклін жазған. Ал, «Айқараңғысы» романы – сол топтаманың беташары. Роман әйгілі желтоқсан көтерілісіне арналған. Сабира сияқты желтоқсан ерлерініңжан-дүниесіндегі санқилы сапырылысқан сезім-күйлер мейлінше шынайы бейнеленген. Кітапты оқып шығу сіздің еншіңізде.

«Мен – жындымын» траги-комедиялық сарында жазылған. Шығарма 2016 жылы «Алтын қалам» конкурсында «Үздік роман» номинациясы бойынша бас жүлдені иеленді. Кітаптажазушы өзі өмір сүріп жатқан қоғамды, адамдарды сынайды. Қазіргі ақын-жазушылардың билікке жағымпаздығын аяусыз әшкерелейді. Ал, шынайы шын жазушыны мына қоғам қалай “жындыға” айналдырғанын сипаттайды. Т.Сәукетаев қазіргі әдебиеттің жай-күйіне алаңдайды, кітабында сол мұң, ашыну сезіледі. Ақырында булығып тіке айта алмаған заман шындығын “жындының” аузына салып береді. Роман жеңіл оқылады, оқырманына ой салады. Қысқасы, өздеріңіз өмір сүріп жатқан қоғамға басқа бір қырынан қарағыларыңыз келсе, кітапты оқыңыз.

Шығыс Қазақстан облыстық А. С. Пушкин атындағы кітапхананың бас библиографы Уалханова Рақия Нұралықызы

«Көлеңкелер патшалығы» кітабына енген повестері мен әңгімелері қазақ елінің соңғы жарты ғасырдағы басынан өткерген қилы заман, қиын кезеңдерін суреттейді атап айтқанда, ашаршылық, сталиндік репрессия, атом бомбасының зардаптарын –шығарманың негізгі желісі. Жазушы замандастарымыздың қайғысы мен қуанышын, арман мен үмітін тартымды, қызғылықты бейнелейді.