Қымбатты достар!

Шығыс Қазақстан облысы бойынша наурыз айында аталып өтетін айтулы күндер туралы хабардар етпекпін.Өлке тарихында өшпес із қалдырған танымал есімдер туралы айтуға кеш емес деп ойлаймын.

4 наурыз - Кенді Алтайдың танымал геологі Павел Петрович Буравтың (1902-1944) туғанына 115 жыл. Геология- минералогия ғылымдарының кандидаты К. Ермолаевтың сөзімен айтсақ: «Кенді Алтайдың қазына байлықтарын ашу үшін Буровқа дейін де, одан кейін де ешкім одан артық еңбек жасаған жоқ. –деп айтуға толық негіз бар!» Бұрынғы Өскемен қаласында 1945 жылға дейін Медвежья деген көше болғаны тарихтан мәлім. 20-30 жылдары қаланың ең шеткі көшесі, Медвежья аралынан басталған соң солай аталған. Кенді Алтай геологиясының «ойлау орталығы» саналған - "Алтайцветметразведка" тресі (бүгінгі Шығыс Қазақстан геологиялық барлау орталығы) орналасқан үлкен ағаш үй көшенің ең басты ғимараты еді. Ал трестің бас инженері- жады мен жаны Павел Буров болатын. Павел Петрович Буровтың есімін мәңгі есте қалдыру үшін 1946 жылы Өскемен қаласындағы Медвежья көшесіне Буровтың есімі берілді.

 16 наурыз күні Семей қаласының тумасы, өлке зерттеушісі, фольклоршы, этнограф, мұражай қызметкері Алексей Николаевич Белослюдовтың туғанына 130 жыл (1887-1939) толды. Туған өлке тарихын зерттеудегі еңбегі орасан зор. 1906 жылы Алексей Николаевич Семейде ағайынды Белослюдовтар деген атпен танымал болған үй мұражайын ашты. Ағайынды Белослюдовтар Семей маңынан көптеген археологиялық жәдігерлер – пышақ, құмыра, жебе, әшекейлер, ескі монеталар тауып, мұражайға қойған. Олардың мұражай қоры Семейдің қалалық мұражайынан еш кем емес еді. Мұражайда геология, минерология, палеонтология, антропалогия көне археология, көне заттар (кітаптар, суреттер, қолжазбалар), нумизматика, этнография, сурет галереясы бөлімдері болды. Әсіресе нумизматика бөлімі өте бай - 1000-нан астам монеталар, тарихқа дейінгі археологиядан - 600 - ден аса жәдігерлер қойылған. Қорында барлығы 4000-нен аса жәдігер болған мұражай қала түрғындарының арасында кеңінен танымал еді. Тұңғыш рет өткен Батыс Сібір мұражайлар көрмесінде Белослюдовтардың мұражайы Кіші күміс медальға ие болды. Кейінірек мұражайдың бір бөлігі Семей облыстық мұражайына өткізілді. Шығыс Қазақстан мемлекеттік облыстық мұрағатында ағайынды Белослюдовтер мұражайы коллекцияларының хронологиялық каталогтары мен түгендеу кітабы сақталған. Соған қарап отырып, өз өлкеміздің тарихын түгендей аламыз.

Осы адамдар туралы «Шығыс Қазақстан: танымал есімдер» сайтынан толығырақ біле аласыздар.

Наурыз айының маңызды оқиғалары аз емес. Айдың екінші жартысындағы мерейтойлар да назар аударуға тұрарлық. Бірақ ол туралы келесі анонста...

Біз өз планетамызды сүйеміз, дегенмен кіші отанымыз – Кенді Алтай өлкесі бәрінен де қымбат!

Зиза Слямова