Тарихта «Ақнайман қырғыны» деген атпен қалған зұлматта Қытайға босып бара жатқан мың жарым бейкүнә қазақты (Ақнайманның Қонақбай руы) кеңес шекарашылары пулемётпен қырып салған.

Ерқасов, К. Ақнайман қырылған [Мәтін]: поэма/ К. Ерқасов. - Өскемен : Шығыс-Полиграф, 2011. - 252 б.

 Өткен күнге көз жүгіртсек қазақстандағы репрессия 1928 жылы байларды кәмпескелеуден басталды. 1925 жылы Қазақстан өлкелік партия комитетінін бірінші хатшысы болып Ф.И.Голощекин тағайындалды. Республиканың саяси-экономикалық және әлеуеттік жағдайымен танысқаннан кейін «Қазақстанға Ұлы Қазан революциясының ешқандай ықпалы болмады, сондықтан мұнда «Кіші Қазан» революциясын жасау керек» деген қорытындыға келіп, республикада репрессиялык шаралар жүргізе бастады. «Асыра сілтеу болмасын, аша тұяқ қалмасын!» деген желеумен жергілікті халықтың малын тартып алды. Малсыз қазақ күн көре алған ба?

Аштық пен күшпен ұжымдастыруға шыдамаған халық Қытай жеріне ауа көшті. Солардың бірі - Қалғұты өңірі Ақши ауылын мекен еткен Қонақбай руы (тоғыз жүз шаңырақ). 1931 жылы шілде айында Қытай жеріне Қалғұты-Егіндібұлақ, Бөкенбай-Былғары Табыты арқылы шекара асуды ойластырады. Ел ауып жатыр деген дүмпуді ести салысымен шекара жасақтары тосқауыл жасап, Марқакөл (қазіргі Күршім) ауданының Қарашілік елді мекеніне маңында қызылдар көшін пулемет оғымен қарсы алады.... Жазықсыз, қарусыз көшті баудай орады.

Тәуекелге бел буған көш алдында Жұматай деген молда баршасына арнап тірідей жаназа оқыған дейді. Қанды оқиғаның жалғыз куәсі - 4-5 жасар қыз бала ғайыптан тірі қалған екен. Қызылдар салған топалаңнан қалған белгі – қалың қорым тұрған жер – Ақнайман қырылған деп аталады.

2011 жылы журналист,ақын,Қазақстан Жазушылар одағының, Қазақстан Журналистер одағының мүшесі жерлесіміз Көпен Ерқасов «Ақнайман қырылған» атты поэма жазып, кітап шығарды. Қанды оқиға туралы толық білгіңіз келсе К. Ерқасовтың «Ақнайман қырылғанын» оқыңыз!

Осы жылы ақнайман қырғыны болған жерге осы өңірден шыққан кәсіпкерлер – ағайынды Бақытбек және Мұрат Манаповтар ескерткіш белгі тұрғызды. Ақнайман ұрпақтары жиналып бабалар рухына тағзым ете отырып, құрбандарды еске алып, қатым оқыды.