«Алтай-Ертіс кітапханасы» сериясымен шығыс қазақстандықтардың 20 томдық жаңа кітабы жарыққа шықты.

Оның тұсаукесері 2012 жылы 17-сәуірде  Астанадағы ҚР Ұлттық академиялық кітапханасында өткен болатын.  

 «Алтай-Ертіс кітапханасы» – елдегі әдебиет саласының алғашқы көлемді өңірлік жобасы. Оның негізін салған Шығыс Қазақстан облысының әкімі Бердібек Мәшбекұлы Сапарбаев.

 Топтаманың алғы сөзін Бердібек Мәшбекұлы «Рухани мұра – оқырман олжасы» деп атаған. Бұл сөздер «Алтай – Ертіс кітапханасы» жобасының мақсатын айқындай түседі, яғни, шығысқазақстандық ғылым, білім, мәдениет қайраткерлерінің рухани мұрасын өскелең ұрпаққа табыс ету.  
20 том, 20 жазушы есімі – тек жерлестердің ғана емес, бүкіл қазақ халқының мақтанышы. Топтама қазақ әдебиетінің кемеңгері, ұлы Абай Құнанбаевтың шығармалар жинағымен бастау алған. Сондай-ақ, «Алтай-Ертіс кітапханасының» бірінші топтамасына Ш.Әбенов, С.Қасқабасов, Қ.Ысқақов, Қ.Жұмаділов, Н.Айтұлы, Ш.Бейсенова, К.Юсупов, Ә.Асқаров, Т.Жұртбай, С.Оразалы т.б. сынды қаламгерлер шығармалары енген. Аталған серия «Мәдени мұра» мемлекеттік бағдарламасы аясында Шығыс Қазақстан облысы әкімдігінің қолдауымен атқарылған игілікті іс және Тәуелсіздіктің 20 жылдығы құрметіне тарту болды. Жаңа авторлардан тұратын кезекті топтаманы үстіміздегі жылдың тамыз айында жарық көрмек.
Қара көк түсте алтын жазу... аспан мен судың түсі, өмір мен жігердің түсі. Ол әркімді терең ой мен ақиқатқа жетелейді. Алтын жазулар - даналық нұры іспеттес...Құнды қазыналар өзінің білімқұмар оқырмандарын асыға күтуде.

«Алтай-Ертіс кітапханасы» туралы:

Елубай, Оңдасын. Кенді Алтай ақын-жазушыларының 20 томдығы [Мәтін] : ["Алтай-Ертіс кітапханасы" жаңа кітап сериясы жайлы] / О. Елубай  // Егемен Қазақстан. - 2012. - 20 сәуір.- Б.11.