Ауылдың «Құйған» деп аталуы Ертістің жағасында, Күршімнің сағасында орналасуына байланысты болса керек. Ескі Құйған ауылы (Усть-Курчум) аудандандастыру кезеңінде аудан орталығы болып табылды. 1928 жылы «Құйған» ұжымшары құрылды. Қаражыра, Қосағаш, Тастоған, Құйған ауылдарының азаматтары колхоздастыруға өз үлестерін қосты. Егін егіп, мал өсірді, балаларын оқытты. Барлық адмадарды бір ғана мақсат жұмылдырды-ол келешекке деген сенім еді. Елді-мекенде аудандық партия комитеті, аудандық атқару комитеті, ГПУ бөлімі, орта мектеп орналасты. Аудан орталығы Құмаш ауылына көшірілгеннен кейін орта мектеп негізінде балалар үйі жұмыс істеді. Балалар үйіне параходпен жетім балаларды әкеліп орналастырған. Олар 1932 жылғы аштықта ата-аналарынан айырылған, әкелері репрессияға түскен жанұя балалары еді. Тек 1931 жылы күршімнен ғана 447 адам «тап жауы» деп танылып сотталған. Олардың қатарында: Қ.Еңсебаев, Р.Жұматов, Р.Тақтыбаев, Н.Тоқтыбаев, О.Ұранхаев, Ш.Айтпенбетұлы, М.Шақпатаев т.б. Ел тыныштығын соғыс бұзып, азаматтар майданға аттанды. Қарттар, әйелдер мен балалар өмір жібін жалғады. Соғыс біткеннен соң Ақтөбе, Қараөзек баурайында астық өсірілді. «Панфилов атындағы» ұжымшар тұрғындарды жұмыспен қамтамасыз етті. «Панфилов атындағы» ұжымшарды ұзақ мерзім басқарған соғыс және еңбек ардагері Әкімбаев Қасымбай 1954 жылы Мәскеудегі Бүкілодақтық ауылшаруашылық саласының еңбекшілерінің съезіне делегат болып қатысты. Бұқтырма ГЭС-і тұрғызылғаннан кейін ауыл бүгінгі орнына көшірілді. Алғашқы қоныстанушылар: М.Әкімбаев, Ш.Нүрекенов, К.Әшімов, Г.Кәрімгозин, Қ.Болыспаев, Қ.Жакупов, Қ.Тойымбаев, С.Шаяхметов, М.Мұқатаев, Қ.Қожахметов, А.Дюсупов, С.Жанаев, Д.Сташко, С.Масақбаев, Ә.Сиқымбаев, П.Журбаның отбасылары болды. Славянка ауылының негізі 1912 жылы қаланды. Алғашқы қоныстанушылар И.Ющенко, Д.И Белоконев отбасылары. 1921 жылы құрылған Қайыңды кеңесінің құрамына кірді. Кеңестің алғашқы төрағасы Д.И Белоконев. 1922 жылы ашылған мектеп 22 баланы біліммен қамтыды. 1930 жылы Қайыңды ауылдық кеңесінің аумағында: «Иртышский», «Елтай», «Қызыл ту» ұжымшарлары құрылды. (төрағалары: В.Г Афанасьев, О.Бабекенов, О.Игісінов). 1925 жылы құрылған комсомол ұйымының алғашқы хатшысы М.Д Ракша. 1927 жылы ұйымдастырылған партиялық бастауыш ұйымының хатшысы В.Д Рыбалко. 1937 жылы кітапхана үйі салынды, сол жылы алғашқы радиоқабылдағыш орнатылды. 1938 жылы алғашқы СТЗ тракторлары келді, алғашқы тракторшылар Ф.Е Выдра, В.П Лушников, 1939 жылы алынған «Универсал» тракторларында Л.С Репин және А.П Репин жұмыс істеді. Ауылда өткізілетін барлық мәдени шаралардың ұйымдастырушысы Е.Я Савина болып табылды. Е.Я Савина Қазақстан ЛКЖО ІІ съезінің делегаты болып сайланды. Баласы И.И Савин облысымыздың ауыл шаруашылығын дамытуға еңбек сіңірген айтулы азаматтар қатарында. Алғашқы марапатталған колхозшылар Б.Жантобетов, «Елтай» бригадасының бригадирі Қ.Уашпаев көп жылдар ерен еңбектің үлгісін көрсетті.

Кеңес үкіметі орнаған жылдары Высокогорка және Саясу селоларында алғашқы партизан отрядтарының белсенді әрекетін атап өту қажет. «Алтайдың қызыл қырандары» партизан отрядының мүшесі К.П Корпачев партизан құрамасынан оралғаннан соң Қараоба селосында алғашқы комунна ұйымдастырды. 1930 жылы «Крестьянка» мен «Роза Люксембург атындағы» коммуналар колхозға бірікті.