Мамыр айының соңғы күні ХХ ғасырдың басында талайды сарсаңға салып, қасірет шектірген саяси қуғын-сүргін құрбандарын еске алу күні. Нақ осы жылдары қазақтың ғылым, мәдениет және саясат саласының зиялы қауым өкілдері жаппай жазықсыз жазаға ұшыраған еді.

Сондай жазықсыз қуғын-сүргін зардабын тартқандардың бірі -  қазақтың көрнекті саяси жəне қоғам қайраткері, Алашорда үкіметінің мүшесі, тарихшы-ғалым,этнограф,  қазақтан шыққан тұңғыш теміржол қатынастарының инженері Мұхамеджан Тынышбаев болатын.

 «Рухани жаңғыру» бағдарламасы аясында  23 мамыр күні сағат 15.00 –де  кітапханада Мұхамеджан Тынышбаевтың туғанына 140 жыл толуына орай  «Мұхамеджан Тынышбаев: Ғұмырдан да ұзақ жол» атты ғұмырнамалық кеш өтті.   

Кешке ішкі істер бөлімінің қызметкерлері, мәдениет саласының мамандары, студент -жастармен қатар теміржол саласының мамандары қатысты.

1879 жылы 12 мамырда Жетісу облысы Лепсі уезі Мақаншы –Садыр болысының Ешкіөлмес тауының маңайында (қазіргі Алматы облысы Қабанбай ауданы) дүниеге келген М. Тынышбаевтың өз халқына жасаған игілікті істері ұшан –теңіз.

«Үлкен террор» құрбаны болған әмбебап ғалым, халқымыздың біртуар перзентінің талайлы тағдыры туралы тамаша естеліктер айтылып, алаш арысының артында қалған мұрасы кеңінен насихатталды. Мұхаметжан Тынышбаевтай қазақтың арда ұлының артында қалған мұрасын насихаттауда, есімін есте қалдыруда ұрпақтарының жасаған ұлықты істерін дәріптейтін бейнефильм көрсетілді.Теміржолшылар династиясын жалғастырушы, ШҚ аймақтық теміржолшылар ардагерлер Кеңесінің төрағасы, М. Тынышбаевтың жерлесі Төлеген Исабаев сөз алып, өз өмір жолында, мамандық таңдауда, М. Тынышбаевтың тигізген ықпалы туралы әңгімеледі. Түрксиб –теміржол торабының халқымыздың экономимкасына тигізген игі әсеріне тоқталды:

«М. Тынышбаевтың есімі ұзақ жылдар аталмай келсе де, біздің ауылдың көнекөздері Мұхаметжанды ұмытпаған еді.Әрі шешеміз жағынан рулас болып келеміз. Оның қажырлы еңбегі мен ұлтына жасаған игі істері ел аузында болды. Өз басым небәрі 27 жастағы Мұхаметжанның Ресейдің 2 Мемлекеттік Думасына делегат болып сайланғынына таң қалдым.Өйткені бұратана халық ішінен таңдау тегін адамға түспесе керек. Осы теміржолшы мамандығын таңдауыма да Тынышбаев туралы естіген әңгімелер әсер етті. Ташкенттің теміржол институтын бітірдім, 40 жылдан артық осы салада еңбек еттім. Қазір зейнетке шықсам да ШҚ аймақтық теміржол ардагерлерінің кеңесіндемін, үнемі жастармен, оқушылармен кездесіп, жастар тәрбиесіне араласып тұрамын. Биылғы жылы бастама көтеріп, Защитадағы Лениногорскя көшесіне – Теміржолшылар, Октябрск көшесіне М. Тынышбаевтың есімі берілуіне көп еңбек сіңірдік.»

Кеш қонақтары «Мұхамеджан Тынышбаев: ғұмырдан да ұзақ жол» атты кітап көрмесімен танысып, қоғам қайраткерінің ұрпақтары жіберген бейнетаспаны тамашалады. Жазықсыз жаланың құрбаны болған тағы бір алаш арысының талайлы тағдырымен танысты.

.