Өскеменнің Шығыс Қазақстан облыстық драма театрында Шығыс Қазақстан облыстық тілдерді дамыту жөніндегі басқармасы Шығыс Қазақстан лингвистикалық орталығының ұйымдастыруымен «Азаттық таңы – алаштың жаны» атты әдеби сазды кеш өткізілді.

Алаш үкіметінің құрылғанына 100 жыл толуына орай өткізіліп отырған шараға аудандық тілдерді дамыту басқармасы, студент-жастар, зиялы қауым өкілдері қатысты. «Алаш құндылықтары және тәуелсіз Қазақстаннның рухани жаңғыру бағдарлары» атты баяндама жасаған С. Аманжолов атындағы ШҚМУ, Біліктілікті бекіту орталығының директоры Филология ғылымдарының кандидаты, доцент Б.Б. Келгембаеваның, «Шығыстан шыққан Алаш қайраткерлерінің өмірі мен қоғамдық қызметі » туралы әңгіме өрбіткен С. Аманжолов атындағы ШҚМУ «Қазақстан тарихы» кафедрасының доценті, тарих ғылымдарының кандидаты Ә.А. Өскенбайдың баяндамаларын қызыға тыңдады. ШҚО драма театры қазақ труппасы қойған «Алаш арыстары» көрінісі алаш ардақтыларының ұлт тәуелсіздігі жолындағы мұрат –мүддесін айқындай түсті. «Алаш туралы не білесіз?» - атты интелектуалдық сайысқа қатысып, оза шыққандар арнайы сыйлыққа ие болды. Оның ішінде А.С. Пушкин атындағы кітапхана қызметкері З. Слямова да бар.

А.С. Пушкин атындағы Шығыс Қазақстан облыстық кітапханасы алаш тарихынан сыр шертетін «Алаш қозғалысына -100» жыл атты кітап көрмесін ұсынды. «Алаш қозғалысының 100 жылдығына орай «Алаштың ақ жолы» атты облыстық айлыққа белсене қатысқан ұжымдар мен жеке тұлғалар   Алғыс хатқа ие болды.