Тұрған жері Қарт Алтайдың бөктері
Шығысында елден алыс шеткері
Катонқарағай атты әсем өлке бар
Қысы ерте келетін, кеш - көктемі.
Белгілі - сол өлкеде орын тепкені
Өр Найманның Қаратайдай текті елі
Әбдікерім Ережепов болыс боп,
Шыңғыстайда елге билік еткені.
Тағдырының көп сүрлеуі, өткелі,
Кез боп заман - тар, аумалы-төкпелі,
Жаңа Кеңес үкіметі сыйғызбай
Белгілі оның Қытай асып кеткені.
Халкы үшін, белгілі - тер төккені,
Жастарына білім нәрін сепкелі
1907- жылы салдырған
Ескерткіш боп қалды артында мектебі.
Комаровты өз елінен шалғайға
Жіберіпті «сенімсіз» деп айдауға,
Шыңғыстайдың мектебінде ұстаз боп
Ұзақ жылдар білім берді талайға.
«Өмір-өзен» деген мынау жалғанда.
Тағдыр солай жазған екен маңдайға,
Топырақ та Шыңғыстайдан бұйырды
Рухы оның калды мәңгі Алтайда.
Сұлтанмахмұт Торайғыров келіпті,
Ұстаз болып үш жыл сабақ беріпті,
Қайтқан екен келісе алмай болыспен,
Қосыла алмай қызына оның көрікті.
Ескеріліп кейін осы сапары,
Ақындықпен шыкқаннан соң атағы,
Әбдікерім салдырған сол мектепті
Сұлтанмахмұт есімімен атады.
Кеңес елі құлатып ақ патшаны,
Жалпақ жұртқа білім бере бастады,
Болыс салған мектеп енді аталды
«Мектебі» боп «кедей-шаруа жастары».
Келіп сонау қуғын-сүргін жылдары
Болған оның еш жазықсыз құрбаны
Көпке үлгі Шыңғыстайлық ұстаздар
Бетке ұстар қыздары мен ұлдары.
Сол лаңды соғыс ары жалғады,
Сабақ берер мұғалім де қалмады,
Қару ұстап ел корғауға аттанған
Қыршындарды соғыс өрті жалмады.
Соғыс бітіп, жанданып бар тіршілік,
Тар кезеңде қалған халық тұншығып
Есін жинап, жана өмірге талпынды
Жастар білім алуға бек құлшынып.
Білім берген жас ұрпаққа жан сала
Ұстаздар көп сыйлы болған баршаға
Шәкірттердің жүрегінде сақталар
Жылдар жылжып өтсе-дағы қаншама.
Есімдерін ел ұмытпай ардақтар
Әр кезеңде басшы болған саңлақтар
Озық етіп мектеп атын шығарған
Еңбектерін тарих өзі салмақтар.
Бұл мектептен түлеп ұшқан алуан
Түрлі маман иесі - ел таныған
Жазушы, ақын, әнші, ғалым, ұстаздар,
Спортшы да шыққан мықты балуан.
Түлектері - белгілі боп халықка,
Есімдері қалған мәңгі тарихта
Аманжолов Сәрсендейін ғұлама,
Бөкейұлы Оралхандай алып та.
Болыс салған мектеп зайырлы
Уақыт өтіп, тозғаннан соң жабылды.
Орнына оның қос кабатты, сәулетті
Типтік мектеп ғимараты салынды.
Соғып жаңа еркін қоғам самалы.
Коммунистік Кеңес елі тарады,
Қазақстан егеменді ел болып
Қазақ халқы түсті жолға саралы.
Қазақстан тарихы да жаңарды,
Үкіметтің шығып берік шешімі,
Бір ғасырдай болған білім бесігі
Шыңғыстайдың мектебіне берілді
Әбдікерім Ережепов есімі.
Автор Талғат Қашқынбаев
Өскемен каласы. 2010ж.
|
|
|
