2011 жыл 19 мамыр сағ.14.00-де А.С.Пушкин атындағы Шығыс Қазақстан облыстық кітапханасында Батыс-Алтай мемлекеттік табиғи қорығы туристік бағытының тұсаукесері өтті.

Шығыс Қазақстанның таңғажайып табиғат сұлулығы жан-жақтағы туристерді де тамсандырмай қоймайды. Азияның кең дала мен шөлейттері Сібірдің таулы тайгасымен үйлесіп, өлкемізге ерекше сән беріп тұр.

Еуразияның көрнекті байлығы - Алтай, ол – көз тартатын өзен-көлдер, ну ормандар, қарлы таулар мен гүлденген алқаптар.

Шығыс Қазақстан облысында, өлкеміздің ғажайып кереметі, 20 жылдық тарихы бар - Батыс-Алтай Мемлекеттік табиғи қорығы ерекше орын алады. Оның негізі - өткен жүзжылдықтың 70-80 жж. қалана бастаған еді. Аталған қорық 1992 жылы 3 шілдеде, ҚР Жоғарғы Кеңесінің шешімімен құрылған. Оның басты мақсаты - Батыс Алтай өлкесінің экологиялық жүйесін, алуан түрлі өсімдік әлемі мен жануарлар дүниесін танып-біліп, қорғау.

Биология ғылымдарының кандидаты, ғалым-орнитолог, жазушы-натуралист, эколог – Б.В.Щербаков кездесудің құрметті қонағы болды. Батыс-Алтай қорығында бір көл мен екі өсімдік түріне осы адамның есімі берілген болатын.

Туристік бағыттар, экологиялық туризмнің дамуы жайлы Риддер қаласы «Бумеранг» мәдени-экологиялық бірлестігінің жетекшісі, Батыс-Алтай қорығының экологиялық ағарту және туризм бөлімінің маманы – Татьяна Бутвилене әңгімеледі.

Батыс-Алтай қорығы кереметі, бай өсімдік және жануарлар қоры жас зерттеушілерді де немқұрайды қалдырмады. Солардың бірі – С.Аманжолов атындағы ШҚМУ-ң магистранты – Садыкова Мадина. Ол аталған табиғи кешенде жаңадан жасалып жатқан туристік бағыттар жөнінде айтып өтті.

Кездесуге қаланың туристік агенттіктері, облыстық тарихи-өлкетану мұражайы қызметкерлері, ҚАЕУ, ШҚМУ, Қ.Нұрғалиев атындағы колледж  студенттері, «Қазақстан-Өскемен» телеарнасының журналистері мен өзге де БАҚ өкілдері қатысты.

Г. Дурдыева

Фоторепортаж