 «Туған өлке –тұнған тарих» |
Осы жылы қандай мерейтойлар аталып өтіледі? Шығыс Қазақстан өңіріне өшпес із қалдырған – қандай жазушы, музыкант, зерттеуші жерлестеріміздің есімдерін еске алып, атап өтеміз? Осы тақырыптар жайында 28 қаңтар сағ. 16.00-де А.С.Пушкин атындағы облыстық кітапханада өткен жыл сайынғы кездесуде айтылды.
2010 жылы аталып өтілетін басты мерейтой – Ұлы Жеңістің 65 жылдығы.
2010 жылы аталып өтілетін басты мерейтой – Ұлы Жеңістің 65 жылдығы.
Жерлестеріміздің жауға қарсы майдан мен тылдағы ерліктері, жеңіс үшін табанды күрестері 65 жыл бойы еш ұмыт болған емес. 109 шығыс қазақстандықтар Совет Одағының Батыры жоғары атағына, 24 адам - Даңқ орденінің иегері атанды. Бүгінгі күні облысымызда 2300-ден астам соғыс ардагерлері бар. Соғыс ауыртпашылықтарын өз мойындарымен көтерген бұл адамдар – еліміздің мақтанышы.
Келер ұрпақ өздеріңе арнадым...
Көп іздендім, өлке өмірін шарладым,
Бабалардың ойлы сөзін қармадым.
Ардақтылар есімдерін ұлықтап,
Келер ұрпақ өздеріңе арнадым.
Қ. Алтыбаев.
Көп іздендім, өлке өмірін шарладым,
Бабалардың ойлы сөзін қармадым.
Ардақтылар есімдерін ұлықтап,
Келер ұрпақ өздеріңе арнадым.
Қ. Алтыбаев.
Отан... Атамекен... Атажұрт...Тарих... Бұл қай құлаққа да асқақ естілер асыл ұғымдар. Адам өмірге келіп, ес жиып, етек жия бастаған сәттен өз Отанының тарихына ден қоя бастайды. Туған өлке тарихын әспеттеп, келер ұрпаққа жеткізу аға ұрпақтың қасиетті парызының бірі.
Қаңтардың қақаған аязында А.С.Пушкин атындағы облыстық кітапхана өз оқырмандарымен жылы шырайда жүздесті.
Дәстүрлі “Туған өлке –тұнған тарих”өлкетану кездесуі 2010 жылы шығыс өңірінде аталып өтілетін айтулы күндерге арналды. Өлкеміздің тарихын тағы да бір шолып, естеліктер айтуға тарихшылар, мұғалімдер, студенттер, мұрағат, мұражай қызметкерлері жиналды.
Қазыналы өлкемізде салынған алғашқы зауыт, жаңа тарихи құжаттар орталығының, облыстық мемлекеттік мұрағаттың құрылуы, баспасөз тарихы туралы мұрағат қызметкері И.В. Дурново келелі әңгіме қозғады.
2010 жылы атақты саяхатшы, географ, этнограф, өлке зертеушісі Григорий Потаниннің туғанына 175 жыл толмақ. Ал Орыс географиялық қоғамының Батыс Сібір бөлімшесінің мүшесі, өлкетанушы-ғалым Хахловтар династиясының негізін қалаған Андрей Степанович Хахловтың туғанына 165 жыл толады. Оның ұлы белгілі орнитолог, зоолог, Зайсан қазаншұңқырын зерттеуші Виталий Андреевич Хахловтың 120 жылдық мерейтойын ғылыми қоғам атап өтуде.
Еліміздің мәдениеті мен ғылымының дамуына үлес қосқан ғалым-лингивист А. Ысқақов, эколог-ғалым М.С. Панин, әдебиеттанушы Р. Нұрғалиев, белгілі абайтанушы, профессор Е. И. Григорьев сияқты танымал жерлестеріміз - өлке мақтаныштары.
Ұлы Абай бастаған бір топ ақын-жазушылар - П Васильев, С. Бегалин, А. Егеубаев, Е. Курдаков, Р. Нурғалиев, биылғы жылдың мерейтой иелері.
Ұстаз, этнограф - тіл білімі, абайтану, этнография, тарих, педагогика тақырыбына жазылған 200-ден астам басылым авторы, Қазақ КСРО-ның еңбегі сіңген ұстазы С. Қасиманов ұмыт қалып бара жатқан тұлға. Ардагер ұстаздың есімін жаңғыртып, өлке тарихына қосқан үлесі туралы тың деректер оқырмандар назарына ұсынылды.
ХХ ғасырда күркіреп өткен алапат қырғын соғыстағы Ұлы Жеңістің 65 жылдық мерекесіне орай М. Қайырбаев, И. Ландышев, П. Кольцов сынды шығысқазақстандық батырлар есімі құрметпен еске алынып, ерлік істері баяндалды.
Қос өзеннің сағасында 1720 жылы іргетасы қаланған сүйікті қаламыз Өскеменнің 290 жылдық мерейтойы жақындап келеді. Қала тарихынан сыр шертетін сирек кездесетін фотосуреттер, мұрағаттық құжаттар мен кітаптар, танымдық слайдтар, деректі фильмдер көпшілік назарына ұсынылды
Даласы дархан, топырағы қасиетті, қойнауы қазыналы Шығыс өңірінің танымал тұлғалары мен айтулы күндеріне арналған кітап көрмесі мен электронды ресурстар кездесудің шырайын ашып, көпшілік көңілінен шықты.
З. Слямова
