«Абай әлемі» кітаптар топтамасы Шығыс Қазақстан облысы әкімдігінің қолдауымен 2018 жылдан бастап жарық көріп келеді. Осы уақыт аралығында «Абай әлемі» кітаптар топтамасымен оқырмандарын таным мен тағылым дүниесіне жетелер, көркем әдебиеттің кәусар шәрбатымен сусындатар тамаша шығармалар жарық көрді.
Ал биылғы жылы аталған кітап топтамасымен адамзаттың алтын бесігі – Алтай баурайындағы жер жаннаты – Катонқарағайдың киелі топырағында кіндік қандары тамған көркем сөздің қаймағын қаққан, руханияттың шырақшысы болған қос талантты жерлес мерейгер тұлғалар Қалихан Ысқақ пен Дидахмет Әшімханұлының 2-томдық шығармалар жинағы жарық көргенін зор қуанышпен хабарлаймыз. 

Қазақ прозасының Қара нары мен публицистиканың ауыр жүгін арқалай жүріп, оқырманына тамаша әдеби көркем шығармалар сыйлаған қос қаламгердің сүбелі шығармалары бүгін оқырманына жол тартты!
Сондай-ақ, биылғы жылғы жаңа топтамамен Шығыс Қазақстан өлкесімен байланысты ел аузынан, түрлі дереккөздерден жинақталған аңыз-әпсаналар топтастырылған «Шығыс Қазақстанның аңыз-әпсаналары» жинағының 2-ші томы жарыққа шықты. Естеріңізге сала кетейік, бұл жинақтың 1-ші томы «Абай әлемі» кітаптар топтамасының 2024 жылғы шығарылымымен жарық көрген болатын.
Құрметті оқырман, шырайлы шығыстың рухани қазынасына айналған әдеби жобаға сәт сапар тілей отырып, жауһар туындылар кітапсүйер қауымның ыстық ықыласына бөлене берсін дейміз!