6 сәуір күні «Кітапханамыздың ашық есіктер» күніне орай ШҚМУ-нің филология факультетінің 3 курс студенттері мен Облыстыќ Жамбыл атындағы мектеп - гимназия оқушыларының· қатысуымен «Алтай-Ертіс кітапханасы» сериясы кітаптарының тұсаукесері өтті.

Бұл – Елбасы өзі қозғау салған «Мәдени мұра» мемлекеттік бағдарламасы бойынша атқарылған игілікті істердің заңды жалғасы және Тәуелсіздіктің 20 жылдығы құрметіне тартуы болатын. Жинақтардың барлығы Шығыс Қазақстан облысы әкімдігінің демеушілігімен жарық көрген. «Алтай-Ертіс кітапханасы» сериясына ұлы Абайдан бастап осы күнге дейінгі шығыс қазақстандық жазушылар мен ақындардың қазақ тіліндегі таңдамалы шығармалары топтастырылған.

Қонақтарымыз өз жерлес ақын-жазушыларының өмірбаяндары мен шығармаларын жақсы білетіндіктерін көрсете білді. Абай, Ұлықбек Есдәулет ақындарымыздың жырларын тебіренте оқумен жалғасты. Кітапхана қызметкерлері «Алтай-Ертіс кітапханасы» сериясының жеке жинақтарына, соның ішінде Шәкір Әбенов, Қабдеш Жұмаділов пен Қалиқан Ысқақтың шығармаларына шолу жасады. Сонымен қатар өткен жиырмасыншы ғасырдың сексенінші жылдарындағы қазақ лирикасына жаңа лек әкелген буынның қатарындағы бірі білсе, бірі білмейтін Нұрлан Мәукенұлының туындыларына тоқталды.

Қоғамымызда әділеттілікті ту еткен атпал азаматтардың бірегейі – көрнекті публицист, сатирик Ғаббас Қабышұлы, қазақ әдебиетінде әскери· тақырыпқа қалам тербеген жазушылардың бірі – Нұрдаулет Ақыш, танымал әдебиетші, сыншы-Төкен Ибрагимов, белгілі қаламгер, көрнекті әдебиеттанушы – Шериаздан Елеукенов, ғалым - Сейіт Қасқабасов, телепублицист, теледраматург – Сұлтан Оразалы және қазақ әйелі табиғатының жыршысы Шәрбану Бейсенова еңбектері және басқа да жерлес ақындарымыздың шығармалары да «Алтай-Ертіс кітапханасы» сериясына енгізілген. Кездесу барысында осындай тамаша, дарынды қаламгерлеріміздің мұралары жайында да сөз қозғалды.

«Алтай-Ертіс кітапханасы» сериясымен ұсынылып отырған жинақтар оқырманның рухани игілігіне айналады деген сенімдеміз.