1-ақпан 2012 жылы А.С.Пушкин атындағы облыстық кітапханада Қазақстан журналистер Одағының мүшесі, Халықаралық Қазақстан-Куба қоғамдық қауымдастығының Вице-Президенті, жазушы, халықаралық публицист, аудармашы әрі ақын – Рүстемов Бақыт Төлегенұлымен кездесу өтіп, оның шығармаларының тұсаукесері жасалды. Жүздесу барысында жан-жақтан жиналған тыңдармандар қонағымызбен жүзбе-жүз кездесіп, өз сауалдарына жауап алды.

Бірнеше тілде 14-тен астам кітабы жарық көрген автордың еңбектері Ресей, Украина, Өзбекстан, Әзірбайжан, Қытай, АҚШ, Франция, Испания, Куба, Сауд Арабиясы Корольдігінің, Чили Республикасы, Никарагуа, Ирак, Иран, Израиль, Турция¸ Нидерланды, Франция, Германия,  Чехия, Польша және басқа да шет мемлекеттерінің мәдени, білім беру ошақтарында және дипломатиялық орталықтарында өзінің лайықты орынын алған.

Қонағымыздың қаламынан Латын Америкасы халықтарына байланысты «Бороться и побеждать», «Күрес пен жеңіс» (үш томнан тұратын) еңбегі, «Великий Китай: в пространстве и во времени» энциклопедиялық кітабы, «Әлемнің тылсым дүниелері», «Көне жер тарихының сыр шертуі», «Әлемдік әдебиеттің игілігі» АҚШ жазушылары туралы билиографиялық қысқаша анықтама тағы да басқа көптеген кітаптар туындаған.

Осы уақытқа дейін Бақыт Рүстемов - Латын Америкасының ойшылы Хосе Марти еңбектерін, Куба революциясының көсемі Фидель Кастро, әлемге әйгілі ғалым Эрнст Мулдашевтің, сондай-ақ исламдық әлемнің діни қайраткері Мирза Тахир Ахмадтың, Мұрат Аджидің және басқа да авторлардың еңбектерін аударған танымал жазушы.
«Қазақстан Тәуелсіздігіне 20 жыл – Қазақстанның Халықаралық публицистикасына 20 жыл» және түрлі безендірілген фотосуреттер мен шетелдік азаматтардың қонағымызға сыйлаған кәдесыйларынан тұратын шағын мұражай көрермендеріміздің көңілінен шықты.

Фоторепортаж