Ақын, зайсандық жерлесіміз, Қазақстан Жазушылар Одағының төрағасы, Ұлықбек Есдәулеттің өлеңдеріне жазылған әндерден жинақталған «Періште қыз» атты жинаққа композиторлардың қалың жұртшылыққа кең танымал шығармалары мен әлі бейтаныс туындылары нотасымен енгізілді.

Олардың қатарында тыңдарман және көрерменнің жүрегіне ұялаған «Заман-ай», «Құс жолы», «Қара пима», «Көздеріне ғашықпын» секілді мәдени қазынаға айналған әндер бар.

Жинақ музыкатанушы мамандарға, өнер сүйер қауымға , жалпы әнқұмар көпшілікке арналған.

Есдәулет, Ұлықбек. Періште қыз [Мәтін] : әндер жинағы / Ұ. Есдәулет. - Астана : Фолиант, 2017. - 152 б.

Қазақ тарихындағы ақтаңдақтар көп-ақ.Әсіресе алаш ардақтылары жайлы деректер толығымен оқырман қолына жеткен жоқ.Сондай ақтаңдақтардың орнын толтыруда алаш қайраткері, халық ақыны Жақсылық Төленұлы туралы шыққан танымдық кітаптың орны ерекше. Есімі көп елене бермеген белгілі қоғам қайраткері Ж. Төленұлы мен оның үзеңгілес серіктері Әлімхан Ермеков, Мұхтар Әуезов, Жүсіпбек Аймауытов туралы тың деректерді оқи аласыз. 
Сонымен қатар кітапта ақын Жақсылық Төленұлының шығармашылығы туралы айтылып, өлеңдері мен әңгімелері берілген.

Семей сынақ полигонының жабылғанына 25 жыл толды. Полигонның бүгінгі жай- күйі сізді алаңдата ма?

Семей полигонын залалсыздандыру жайындағы «Бұрынғы Семей сынақ полигонын қауіпсіз күйге келтіру жөніндегі ғылыми-техникалық және инженерлік жұмыстар кешенін жүргізу» атты үш томдық еңбек жарық көрді. Жинақтың авторлары: Н.Ә.Назарбаев , В.С.Школьник, Е.Ғ.Батырбеков, С.А.Березин, С.Н.Лукашенко, М.Қ.Ысқақов.

Жинақта ҚР Ұлттық ядро орталығының бұрынғы ССП әскери-өндірістік кешенін конверсиялау бойынша шетелдік әріптестерімен ынтымақтастықта жүргізген жұмыстарының, атом энергетикасы және радиоэкология қауіпсіздігі саласындағы ғылыми-техникалық ынтымақтастықтың қомақты тәжірибесі қамтылған.

Полигонның бүгінгі жай- күйі, экологиясы, залалсыздандыру мәселесі қызықтырса кітапханаға асығыңыз!

Белгілі қазақ жазушысы Роллан Сейсенбаев аса көрнекті шығармашылық қызметі үшін  Антуан де Сент-Экзюпери  атындағы  халықаралық сыйлықтың лауреаты атанды.  Мұндай шешім Германия мен Францияның  әдебиет, өнер мен мәдениет қайраткерлерінің «Глория-Лион» ассоциациясы бірауыздан қабылдаған.

Осыған жалғасқан екінші  жағымды жаңалық та көп күттірмеді. Америка Құрама штаттарының Сан-Франциско қаласында орналасқан Халықаралық Арт орталығы 2018 жылғы Джек Лондон атындағы халықаралық әдеби сыйлығының лауреаттарын жария етті. Мәртебелі сыйлықпен марапатталған әр елдің мәшһүр жазушыларының арасында көрнекті қазақ жазушысы Роллан Сейсенбаев та бар. Оның «Құм кезген өліктер» роман эпопеясы XXI ғасырдың таңдаулы романдарының бірі деп танылды.   Жерлесіміз, дарынды жазушыны сыйлығымен құттықтап, еңбегіне шығармашылық шабыт, зор денсаулық тілейміз!